Bakının Ağ şəhər ərazisində avtoxuliqanlıq edən şəxsin dostu polis avtomobilinin üzərinə benzin tökərək yandırmaq istəyib. Bu haqda bu gün, 15 oktyabr tarixində Qafqazinfo-ya istinadən Bakuplus.az məlumat verir.
Hadisə 13 oktyabr tarixində baş verib. “Saipa” markalı minik avtomobilinin sürücüsü avtoxuliqanlıq əməlləri törədərkən avtomobili yolun hərəkət hissəsinin qarşısında saxlayıb.
Ərazidə olan yol polisi əməkdaşları yaxınlaşaraq nəqliyyat vasitəsinin dayanacağa aparılacağını bildiriblər.
Lakin sürücünün avtomobildə olan dostu 22 yaşlı Famil Alxasov (ad şərtidir) buna etiraz edərək polislərlə mübahisə etməyə başlayıb. Polis əməkdaşları onu sakitləşdirmək istəyəndə o, avtomobildən benzin götürüb. Gənc polis əməkdaşlarını onların və xidməti maşınının üzərinə benzin tökərək yandıracağı ilə hədələyib. O, əməkdaşların tələblərinə məhəl qoymayaraq əməllərinə davam edib.
Hadisə yerinə gələn PPX əməkdaşları Alxasovu polis bölməsinə aparıblar. Şəxs barəsində “Polisin qanuni tələblərinə tabe olmama” maddəsi üzrə protokol tərtib olunaraq Xətai Rayon Məhkəməsinə göndərilib. Məhkəmə Alxasovun 10 gün müddətinə inzibati qaydada həbs edilməsinə qərar verib.
