Bu gün, 12 aprel tarixində Bakı Ağır Cinayətlər Məhkəməsində 24-cü polis bölməsində, iş yerində arvadını güllələyən keçmiş polis serjantı İsmayıl Məmmədovun cinayət işi üzrə məhkəmə istintaqı yekunlaşıb. Bu haqda Report məlumat verib.
Məmmədov 18 il müddətinə azadlıqdan məhrum edilərək, cəzasını ciddi rejimli cəzaçəkmə müəssisəsində çəkməyə məhkum edilib.
Zərərçəkmiş şəxsin ailəsinin hüquqi vərəsələrinin təqsirləndirilən şəxsdən 8000 manat pulun alınması ilə bağlı mülki iddiası da təmin edilib.
Ötən ilin sentyabrın 30-da saat 09:00 radələrində İsmayıl Məmmədovun həyat yoldaşı Xanım Məmmədova 24-cü polis şöbəsinə ailə münaqişəsi barəsində şikayətə gəlmişdir. Bundan xəbər tutan polis əməkdaşı şöbəyə gələrək xidməti silahla orada kiçik uşağının gözü qarşısında arvadını qətlə yetirmişdir.
