Bakıda məşhur gül mağazaları və gözəllik salonlarını yaran şəxsə hökm oxunub. Bu haqda 27 sentyabr tarixində Ölkə.az məlumat verib.
Fərid Qənbərov (soyadı şərtidir) ona qarşı irəli sürülmüş ittiham üzrə özünü tam təqsirli bilərək ifadəsində göstərib ki, 2021-2022-ci illərdə iş yeri olmadığından mobil telefon oğurlayaraq müxtəlif mağazalara satmaqla ehtiyaclarını ödəyib. O, tanınmamaq üçün tibbi maska taxırmış.
Təqsirləndirilən şəxs müxtəlif vaxtlarda oğurluq hadisələri törədib:
- 25 oktyabr 2021-ci il - gözəllik salonundan müştəriyə məxsus 285 manat pulla birlikdə 2200 manat dəyərində "İphone 11” markalı mobil telefonu oğurlayıb;
- 25 mart 2022-ci il - "Ay VİP” qadın gözəllik salonundan saç ustasına məxsus 2700 manat dəyərində "İphone 12 Pro Max” markalı mobil telefonu aparıb;
- 12 aprel 2022-ci il - "Lovely” gül mağazasından "İphone 13 Pro Max" və "Samsung A10S" markalı mobil telefonları oğurlayıb. Telefonlar mağazanın sahibinə məxsus olub. Ona ümumilikdə 4430 manat ziyan dəyib;
- 28 mart 2022-ci il - "Tre Fiori” gül mağazasından 1300 manat dəyərində "İphone 12 Pro Max” markalı mobil telefonu oğurlayıb;
- 11 aprel 2022-ci il - "Bakı Estetik” qadın gözəllik salonunda masanın üzərində olan, müştəriyə məxsus "İphone 12” markalı mobil telefonu götürüb. Telefonun dəyəri 2602 manat olub;
- Aprel 2022-ci il - "Şehli Beauty” gözəllik salonundan müştəriyə məxsus 2 ədəd "Samsung" markalı mobil telefon oğurlayıb;
- 14 aprel 2022-ci il - gül mağazanın birindən, satış masasının üzərindəki 3 ədəd mobil telefonu ("İphone 13 Pro Max”, "İphone X”, "Samsung A10S”) aparıb.
Fərid Qənbərov 16 aprel 2022-ci il tarixində polis əməkdaşları tərəfindən saxlanılıb və CM-in “Oğurluq təkrar törədildikdə” maddəsi ilə 3 il 6 ay müddətinə azadlıqdan məhrum edilib. Təqsirləndirilən şəxs törətdiyi əməlləri etiraf edib. Polis oğurluq hadisələrini maska ilə törədən şəxsi uca boyu, arıq, əyri ayaqları ilə müəyyənləşdirib.
