Özünü DTX əməkdaşı kimi təqdim edən şəxs Bakı sakinin pulunu mənimsəyib. Bu haqda 20 sentyabr tarixində Qafqazinfo məlumat verib.
Bakı sakini Fərid Xudatzadə özünü Dövlət Təhlükəsizliyi Xidmətinin baş leytenantı kimi təqdim edərək Pərviz Məmmədovdan 6150 manat pul alıb. O, Pərvizi DTX-də sürücü kimi işə düzəldəcəyinə söz verib. Xudatzadə eyni əməli Məmmədovun tanışı Roman İbrahimova qarşı da törədib və ondan
3030 manat alaraq onu da qurumda sürücü kimi işə qəbul etdirəcəyini bildirib.
Lakin vədinə əməl etmədiyi üçün zərərçəkmişlər Fərid barəsində polisə şikayət ediblər. Araşdırma zamanı onun yalan danışdığı, DTX-də işləmədiyi məlum olub.
Xudatzadə Cinayət Məcəlləsinin “Dələduzluq”, “Vəzifəli şəxsin səlahiyyətlərini mənimsəmə” və “Rüşvət vermədə iştirakçılıq” maddələri ilə ittiham olunub. Hazırda iş Bakı Ağır Cinayətlər Məhkəməsində araşdırılır.
