Bakıda özünü dilənçi kimi təqdim edən narkomanlar peyda olublar. Bu haqda 30 sentyabr tarixində Xəzərxəbər məlumat verib.
Tədris ocaqlarının ətrafında dilənçilər, tüfeylilər və narkomanların sayı artıb. Onlar əhalinin sıx olduğu yerlərdə dayanaraq vətəndaşlardan pul istəyir, hətta bəzən onlardan yemək üçün nəsə almalarını da xahiş edirlər.
"Bəzən görürük ki, bu şəxslər əməllərini öz həyat tərzinə çeviriblər. Hətta yetkinlik yaşına çatmayanlar da dilənçiliyə sövq edilir. Yetkinlik yaşına çatmayan diləndirilən şəxsin valideynləri varsa, o, polis əməkdaşları tərəfindən evinə təhvil verilir. Digər şəxs barəsində də qanunamüvafiq tədbirlər görülür", - məsələ ilə bağlı DİN-in mətbuat xidmətinin əməkdaşı Nurlan Əliyev açıqlama verib.
N.Əliyev bildirib ki, dilənçi, avara və tüfeyli həyat tərzi sürən şəxslər arasında narkotik vasitələrdən və psixotrop maddələrdən istifadə edən, oğurluq və digər cinayət törədən şəxslər də aşkarlanır.
