Bakıda gənc oğlan avtomobil qaçırıb, sonra isə sürücünün yolda qaldığını görərək onu evə aparıb. Bu haqda 18 oktyabr tarixində Qafqazinfo məlumat verib.
Bakıda taksi sürücüsünə qarşı bıçaqla hücum edərək onun pulunu və avtomobilini əlindən alan şəxsin məhkəmə prosesi başa çatıb. Belə ki, 18 yaşlı Cəlal Quliyev (soyad şərtidir) 8 il 6 ay müddətinə azadlıqdan məhrum edilib.
Cəlal cari il iyulun 6-da gecə 03:15 radələrində metronun “Koroğlu” stansiyası yaxınlığında taksi kimi dayanmış “Toyota Prius” markalı avtomobilə yaxınlaşıb və sürücü Həsəndən onu Montin qəsəbəsinə aparmağı xahiş edib. Ünvana çatanda isə, Cəlal bıçaqla Həsəni hədələyərək üzərindəki pulları tələb edib. Cəlal 370 manatı və Həsənin maşınını əlindən alıb.
Sükan arxasına keçən Cəlal Həsənin yolda qaldığını görüb və onu “Nizami Mall” ticarət mərkəzinin yaxınlığında qaldığı evə aparıb. Həsəni evə düşürəndən sonra Cəlal həmin avtomobillə Masallı rayonu istiqamətində gedib.
