Bakıda rüşvət almaqda təqsirləndirilən şirkət direktoruna hökm oxunub. Bu haqda BakuPlus.az Report-a istinadən bu gün, 19 sentyabr tarixində xəbər verir.
Ağır Cinayətlər Məhkəməsinin hakimi Mahmud Ağalarovun sədrliyi ilə keçilən prosesdə Orxan Ələkbərov 9 il müddətinə azadlıqdan məhrum edilib.
O.Ələkbərov karantin rejimi ilə bağlı polis postlarına icazə sənədi təqdim edərək sərbəst hərəkət etmək istəyən ayrı-ayrı şəxslərə direktoru olduğu, faktiki heç bir fəaliyyət göstərməyən “Vest Corporation” MMC-nin adından saxta arayışların hər birini 60-100 manat müqabilində satarkən saxlanılıb.
Adıçəkilən şəxs özü də daxil olmaqla 18 vətəndaşı saxta sənədlər əsasında “icaze.e-gov.az” portalında qeydiyyatdan keçirib, həmin şəxslərin adına saxta əmək müqavilələri tərtib edib.
Saxlanılan şəxsin paytaxt ərazisindəki yaşayış ünvanına baxış zamanı eyni məqsədlə hazırlanmış saxta arayışlar, boş blanklar, möhür və iş üçün əhəmiyyət kəsb edən digər maddi sübutlar aşkar olunaraq götürülüb.
O.Ələkbərov Cinayət Məcəlləsinin 311.3.2-ci (Təkrar rüşvət alma) maddəsi ilə ittiham edilib.
