Külli miqdarda dələduzluqda ittiham olunan şəxsin cinayət işi üzrə məhkəmə araşdırması başa çatıb. Bu haqda BakuPlus.az Apa-ya istinadən bu gün, 30 avqust tarixində xəbər verir.
Bakı Ağır Cinayətlər Məhkəməsində Hakim Eldar İsmayılovun sədrliyi ilə keçirilən prosesdə Elvin Əhmədpur külli miqdarda dələduzluqda təqsirli bilinərək 7 il 6 ay müddətinə azadlıqdan məhrum olunub.
Elvin Əhmədpur bir neçə nəfər 1-ci Qarabağ müharibəsi veteranına Qaradağ rayonu “Qobu Park” yaşayış kompleksindən mənzil ala biləcəyi vədini verərək onların külli miqdarda pulunu ələ keçirib.
O, zərərçəkmişlərə güzəştli şərtlərlə ev almaqda “Şəhid Ailələrinə Sosial Dəstək” ictimai birliyinin sədri olan anası Almaz Zeynalovanın kömək edəcəyini deyib.
