Əməkdar artistin qardaşına qarşı quldurluq edən şəxslərdən biri ziyalı ailənin qızıdır. Bu haqda 24 avqust tarixində Qafqazinfo.az məlumat verib.
Daha öncə, Bakıda qadınların da üzv olduğu quldur dəstəsi saxlanılmışdır. Dəstə üzvlərinin narkotik asılılığından əziyyət çəkdikləri məlum olub. Cinayətdə şübhəli bilinərək tutulan şəxslərdən biri - Jalə Mahmudova barəsində maraqlı faktlar üzə çıxıb.
O, narkotikə ilk dəfə həyat yoldaşı tərəfindən öyrədildiyini və ərindən ayrıldıqdan sonra 65-70 yaşlı başqa bir kişinin onda narkotik asılılığı yaratdığını deyib.
“Mən ziyalı ailəsində böyümüşəm, atam dövlət qulluqçusu, anam müəllim idi. Hər zaman mənə dəstək olublar. Amma görəndə ki, bu yola düşmüşəm, nəslin üz qarasına çevrildim”, - Jalə Mahmudova bildirib.
Quldurluq hadisəsi aldatma yolu ilə törədilib. Xalq artisti Valeh və Əməkdar artist Loğman Kərimovların qardaşı Əflatun Kərimovun evinin qapısını döyən Jalə ona qonşu olduğunu deyərək açmasını bildirib. Əflatun qapını açdıqda, dəhlizdə gizlənmiş 2 kişi mənzilə basqın edərək onu döyüb və narkotik axtarmağa başlayıblar.
Quldur dəstəsi polis tərəfindən saxlanılıb və faktla bağlı araşdırma aparılır.
