Paytaxtda XIX əsrdə Xəzərdə ən təcrübəli kapitan kimi ad çıxaran Hacı Vahab Əliqulu oğluna həsr olunan film çəkilib. Bu haqda bu gün, 24 oktyabr tarixində Bakuplus.az Bakı Gündəliyi Facebook səhifəsinə istinadən məlumat verir.
“Üç əsrə şahid” adlı qısametrajlı bədii-sənədli filmdə milli gəmiçiliyin tarixi, ənənələri, bugünkü inkişafı əksini tapıb. Filmdə Hacı Vahabın timsalında dənizçilərimizin ümumiləşdirilmiş obrazı təqdim olunub.
Film “Azərbaycan Xəzər Dəniz Gəmiçiliyi” QSC-nin sifarişi ilə çəkilib. Quruluşçu rejissoru Əməkdar incəsənət xadimi Elxan Cəfərovdur. Filmdə əsas qəhrəmanı (Hacı Vahab) Xalq artisti Fəxrəddin Manafov canlandırıb.
Film yaxın günlərdə “Azərbaycan Xəzər Dəniz Gəmiçiliyi”nin bütün rəsmi platformalarında təqdim olunacaq.
Hacı Vahab Əliqulu oğlu 1855-ci ildə Bakıda – İçərişəhərdə anadan olub. Təhsil almasa da, o dövrün bir çox gəmi sürücülərindən fərqli olaraq, Hacı Vahab diplomlu kapitan olub. Sankt-Peterburqda əldə olunan diplom Milli Azərbaycan Tarix Muzeyində saxlanılır. Hacı Vahab 1916-cı ildə 61 yaşında dünyasını dəyişib.
