Bakı metrosunda "28 May-Nizami" xəttində hərəkətin dayanması ilə bağlı Azərbaycan Yerüstü Nəqliyyat Agentliyi tərəfindən təşkil olunan 6 yeni ekspress marşrut xətti fəaliyyət göstərir.
Bunu Azərbaycan Yerüstü Nəqliyyat Agentliyinin (AYNA) mətbuat katibi Tural Orucov jurnalistlərə açıqlamasında deyib.
"Bu gün Bakı Metropoliteni Qapalı Səhmdar Cəmiyyətində xətlərin ayrılması layihəsinə start verildiyinə görə vətəndaşlarımız aktiv şəkildə bu ekspress marşrut xətlərinin imkanlarından istifadə edirlər. 28 May Nəqliyyat Mübadilə Mərkəzində M1, M2 və M3 nömrəli üç ekspress marşrut xətti fəaliyyət göstərir. M1 nömrəli ekspress marşrut xətti İnşaatçılar metrostansiyasını 28 May Nəqliyyat Mübadilə Mərkəzi ilə, M3 nömrəli ekspress marşrut xətti 20 Yanvar metrostansiyasını 28 May Nəqliyyat Mübadilə Mərkəzi ilə əlaqələndirir. Xüsusilə qeyd edim ki, M1 nömrəli ekspress marşrut xətti və M3 nömrəli ekspress marşrut xətti həm Elmlərdən, həm 20 Yanvardan Nəqliyyat Mübadilə Mərkəzinə gələn nəqliyyat avtobuslar aralıq dayanacaq olaraq Nizami metrostansiyasının qarşısında saxlayır vətəndaşlar burada da minib və düşə bilərlər",- o bildirib.
Onun sözlərinə görə, M4, M5 və M6 nömrəli üç əlavə ekspress marşrut xətti də təşkil olunub: "M4 və M5 20 Yanvar metrostansiyasından hərəkət edir. M4 20 Yanvar metrostansiyasını Koroğlu metrostansiyası ilə, M5 isə 20 Yanvar metrostansiyasını Gənclik metrostansiyasına əlaqələndirir. Nəhayət, M6 nömrəli ekspress marşrut xətti Elmlər Akademiyası metrostansiyasından artıq Gənclik metrostansiyasına hərəkət edir ki, buradan da vətəndaşlar bu ekspress marşrut xətlərindən imkanlarından yararlanaraq o istiqamətə hərəkət edəcəklər".
AYNA rəsmisi sonda vətəndaşlara da müraciət edib:
"Biz buradan vətəndaşlarımıza müraciət edirik ki, səfərlərini planlayan zaman öncədən istiqamətlərini düzgün qiymətləndirsinlər və bu ekspress marşrut xəttlərinin imkanlarından düzgün yararlansınlar. Əsas qayəmiz insanların səfər sayını minimuma endirməkdir. Bundan savayı, mövcud olan 20 müntəzəm avtobus marşrut xəttlərinə əlavə avtobuslar, 100-ə yaxın avtobus cəlb olunub ki, xəttlərdə avtobusların sayı artırılsın və əlçatanlıq artsın, insanlar rahat şəkildə avtobuslardan istifadə edə bilsinlər. Vətəndaşlara kömək məqsədilə bu gündən nəqliyyat könüllüləri də fəaliyyətə başlayıb. Onlar 20 Yanvar, 28 May, Elmlər Akademiyası və İnşaatçılar metrostansiyasının qarşısında duraraq vətəndaşlarımıza məlumat verirlər",- Tural Orucov bildirib.
mənbə: APA
