Çoxsaylı yanaşı xəstəlikləri olan 95 yaşlı pasiyent üzərində həyata keçirilən mürəkkəb cərrahi əməliyyat uğurla başa çatıb.
Bu barədə Bakuplus.az-a TƏBİB-dən məlumat verilib.
Bildirilib ki, Respublika Klinik Xəstəxanasında 1930-cu il təvəllüdlü qadın pasiyent üzərində riskli əməliyyat icra olunub. Tibb müəssisəsinə sol bud sümüyünün sınığı səbəbilə müraciət edən 95 yaşlı Savat Quliyevada ürək problemləri, böyrək funksiyasının pozulması (kreatinin yüksəkliyi), bağırsaq problemləri, qanaxma meyilliliyi və s. yan xəstəliklər aşkarlanıb.
İlkin müraciətdə zəruri tibbi xidmətlər göstərilən şəxsə sol bud sümüyünün burmalardan keçən sınığı diaqnozu təyin edilib, xəstəxananın Travmatologiya və ortopediya şöbəsinə yerləşdirilib.
Səhhətində olan yanaşı xəstəliklərə görə bır sıra tibb müəssisələrində cərrahi əməliyyatına imtina verilən 95 yaşlı şəxsin sağlamlıq vəziyyəti bir daha nəzərdən keçirilib. Bir neçə həkim - kardioloq, anestezioloq-reanimatoloq və travmatoloq tərəfindən həyata keçirilən konsiliumdan sonra riskli əməliyyatın icrasına qərar verilib, cərrahi müdaxilə uğurla başa çatıb.
Pasiyent üzərində sol bud sümüyünün osteosintezi əməliyyatı həkim-travmatoloq-ortoped Pərvin Hüseynovun rəhbərliyi, həkim-anestezioloq-reanimatoloq Fatma Əhmədova, assistent Cavid İlyaszadənin iştirakı ilə icra olunub.
Uğurlu baş tutan əməliyyatdan sonra pasiyentin müalicəsi müvafiq şöbədə davam etdirilib və vəziyyəti stabil qiymətləndirildikdən sonra ambulator müalicə üçün evə buraxılıb.
