Bakının Nəsimi rayonunda yerləşən Səməd Vurğun adına istirahət parkında qızla görüşən gəncin mobil telefonu oğurlanıb.
1987-ci il təvəllüdlü Hamlet parkda skamyada əyləşən Ülvinin telefonunu oğurlayıb və ona 1203 manat maddi ziyan vurub.
İstintaq sənədlərinə əsasən, Ülvin tanışı Ülviyyə ilə skamyada əyləşərək onun mobil telefonunda "TikTok"a baxıb. Bu zaman özünün "iPhone 15 Pro" markalı telefonunu skamyanın üzərinə qoyub. Hamlet isə onların diqqətinin yayındığı andan istifadə edərək telefonu götürüb.
Hamlet ifadəsində hadisəni etiraf edib. O, əvvəllər də oğurluq maddəsi ilə məhkum olunduğunu və 2024-cü ilin sentyabrında azadlığa buraxıldığını bildirib. Telefonu satmaq fikrindən isə onun "iPhone" olduğunu bildikdən sonra daşındığını deyib.
Nəsimi Rayon Məhkəməsinin hökmü ilə Hamlet 4 ay 16 gün müddətinə azadlıqdan məhrum edilib. O, cəzasını ümumi rejimli cəzaçəkmə müəssisəsində çəkəcək.
Qeyd edək ki, adlar şərtidir.
Mənbə: demokrat.az
