Bu günümüz də adət etdiyimiz kimi başladı. Yenə metrodakı basabas, yenə qatarların yubanması, yenə perronda səsgücləndiricəlrdən beynimizi qaynadan "Xətdən kənara çəkilin!" hayqırtıları. Bir sözlə - "Bakı Metropoliteni"nin müəllifi olduğu növbəti ekşn. Amma bu dəfə barıtı bir qədər çox oldu. Hər stansiyada qatarlar 1-2 dəqiqə yubanır, yola düşdükdən sonra isə eyni hal tuneldə yaşanır. Hə, əlbəttə ki, metro rəhbərliyi mətbuat xidməti vasitəsi ilə bu baş verənlərin növbəti "məntiqi" izahını verdi. Nə dedi? Əşi, nə fərqi var – növbəti "üzrlü səbəb". Ya hansısa sərnişin qapıya kəllə atıb və qapı "nokauta düşüb", ya kimsə mövsümə uyğun geyinmədiyinə görə vaqona sığmayıb və qapılar bağlanmayıb, ya da başqa bir cəfəngiyyat. İstənilən halda, metronun "şanlı" işçilərinin məntiqinə əsasən, günah bizdədir, sərnişinlərdə. Nə olur olsun, onlar pak-pakizə, biz isə...
Bizim mətbuat xidmətimiz yoxdur. Olsun. Amma icazə verin heç olmasa bir dəfə ürəyimizi boşaldaq. Sadəcə çox maraqlıdır: o boyda təşkilatda qatarların normal hərəkəti qrafikini tərtib etməyə qadir 1 nəfər də yoxdur? Doğurdan? Bəs o boyda kollektivdə dövlətdən aldığı məvacibdən utanıb üzərinə düşən vəzifəni layiqincə yerinə yetirmək istəyən bir məsul şəxs də yoxdur? Əgər yoxdursa, lütfən, 1-2 yer boşaldın və vəziyyəti dəyişə biləcək şəxsləri iş başına gətirin. Yox, varsa, o zaman nəhayət normal işə başlayın. Sizin normal işə başlamanız üçünsə çox böyük tədbirlərə ehtiyac yoxdur. Sadəcə "Bakı metropoliteni"nin rəhbər vəzifədə olanlarını cəmi 1 həftə pik saatlarında işə metro ilə gedib-gəlmələrini təmin etmək yetər. Vəssalam! Əminik ki, bundan sonra daha camaatı güldürən açıqlamalarla müşahidə olunacaq yubanmalara şahidlik etməyəcəyik...
P.S. Hələliksə hər səhər və axşam Bakı metrosundan istifadə etmək məcburiyyətindəyik. Hər dəfə də qatar tunelin qara dəliyinə daxil olanda oranı nə zaman tərk edəcəyini həyəcanla gözləyirik: 3 dəqiqə, 5 dəqiqə, 10 dəqiqə... Bir Allah bilir, bir də "Bakı Metropoliteni". İstənilən halda – onlar haqq, sərnişinlər isə kütləvi surətdə "nahaqdırlar".
