"Bakının Süleyman Rəhimov küçəsində aparılan səki təmiri bir daha göstərir ki, şəhərsalmada universal dizayn prinsiplərinin tətbiqi və standartlara real nəzarət hələ də yetərli səviyyədə deyil. Səki normadan artıq qaldırılıb, əlavə pillələr qurulub, ardınca isə bunu kompensasiya etmək üçün formal pandus həlli verilib. Bu yanaşma inklüzivlik deyil — sadəcə normativin kağız üzərində yerinə yetirilməsi təəssüratı yaradır. Halbuki universal dizaynın əsas prinsipi odur ki, mühit hamı üçün — yaşlılar, uşaqlı valideynlər, əlilliyi olan şəxslər daxil — eyni dərəcədə rahat və təhlükəsiz olsun, əlavə "adaptasiya"ya ehtiyac qalmasın".
Bakuplus.az xəbər verir ki, bunu öz sosial şəbəkə hesabında nəqliyyat məsələləri üzrə ekspert Rauf Ağamirzəyev yazıb.
Ekspert belə halların qarşısını almaq üçün təkliflər də irəli sürüb: "Standartlar yalnız mövcud olmamalı, daha dəqiq və sərt tətbiq edilməlidir. Layihələndirmə mərhələsində istifadəçi yönümlü yanaşma əsas götürülməlidir. İcra zamanı isə keyfiyyətə nəzarət və məsuliyyət mexanizmləri gücləndirilməlidir. Əks halda biz eyni problemi təkrar-təkrar görəcəyik: yüksək bordürlər, əlavə pillələr və formal panduslar. Bu isə müasir şəhər deyil, sadəcə vizual olaraq yenilənmiş, amma funksional olmayan mühit deməkdir".
