Abdulla Şaiq adına Dövlət Kukla Teatrının rejissoru Səidə Haqverdiyeva həyat yoldaşı Rəşad Əhmədzadə direktoru olduğu teatrda işləməsinə maneə yaradılması səbəbindən boşanmaq məcburiyyətində qaldığını bildirib.
Bakuplus.az xəbər verir ki, Səidə Haqverdiyeva bu məcburiyyətin yaradılmasında teatrın aktrisası Nərmin Əhmədovanı və Mədəniyyət Nazirliyində onu himayə edən şəxsləri günahlandırıb.
"Bunun nəticəsidir ki, Nərmin nəqliyyat şirkəti sahibi əri Əfsun Əhmədov və ona himayədarlıq, bir növ yuxarı dairələrdə, konkret olaraq Mədəniyyət Nazirliyində havadarlıq edən bir neçə məmurun dəstəyi sayəsində teatr rəhbərliyinə və birbaşa şəxsimə təzyiqlər və təhriklər edir" - deyə Səidə Haqverdiyeva qeyd edib.
Nərmin Əhmədova ilə aralarında olan çoxsaylı konflikt epizdolarından bəhs edən Səidə Haqverdiyevanın iddialarına görə, Nərmin Əhmədova sonda Mədəniyyət Nazirliyi qarşısında onun diplomunun nostrifikasiyadan keçmədiyi məsələsini qaldırıb:
"Qeyd edim ki, mən Sankt-Peterburq Dövlət Mədəniyyət İnstitutunda 2015-2020-ci illərdə bakalavr, 2020-22-ci illərdə isə magistraturada təhsil almışam. Magistratura pilləsinin son 6 ayında səhhətimlə əlaqədar təhsilimi dondurmalı oldum. Sonrakı gərgin iş qrafiki – tamaşalar, filmlər, tədbirlər səbəbindən düşündüm ki, hər iki diplomumu eyni vaxtda nostrifikasiya etdirim. Qəribə olsa da, bu sadə prosesi bəzi səlahiyyət sahibləri əllərində rəhbər tutaraq həyat yoldaşım Rəşad Əhmədzadəyə "Səidənin ərizəsini alın, ikiniz bir yerdə işləyə bilməzsiniz" kimi absurd ittihamlar irəli sürürlər".
Səidə Haqverdiyeva Nərmin Əhmədovanı himayə edən və ona təzyiq göstərənlər arasında Mədəniyyət Nazirliyinin bir neçə əməkdaşının olduğunu qeyd edib, protokol sektorunun müdiri Allahşükür Zülfüqarlının, Mədəniyyət Nazirliyi İncəsənət və qeyri-maddi mədəni irs şöbəsinin Teatr sektorunun müdiri Böyükxanım Talıbovanın adlarını da çəkib.
"Ümid edirəm ki, qarşılaşdığımız bu ağlasığmaz hərəkətlərin əsaslı cavabı olacaq. Ən azı xoşbəxt ailəmi dağıtmaqdan zövq alan, həyat yoldaşıma "Ya Səidə, ya da sən işdən çıxmalısınız" tələbini edən, "Səidə işdən çıxmasa onun ictimai nüfuzuna ləkə vurarıq" kimi ultimatumlardan çəkinməyən kiçik məmurlar əməllərinə son qoyacaqlar" - Dövlət Kukla Teatrının rejissoru Səidə Haqverdiyeva bildirib.
Qeyd edək ki, Abdulla Şaiq adına Dövlət Kukla Teatrının direktoru Rəşad Əhmədzadənin həyat yoldaşı, rejissor Səidə Haqverdiyeva ötən gün boşanmaq qərarı verdiyi açıqlamışdı. "Həyat yoldaşımdan ayrılmaq üçün məhkəməyə müraciət etmişəm. On il idi evli idik. Amma beş ildir mənə və ailəmə təzyiq edən şəxslər var, onlarla mübarizə aparırıq. Həmin şəxslərin adını açıqlayacam", - deyə rejissor bildirmişdi.
