Dilarə Kazımovanın "Dəli" mahnısı tanınmış aktyor Liam Nison və Zakari Livayın baş rollarında çəkildiyi "The Fix" ("Əməliyyat: Qisas") Hollivud filmində səsləndirilib.
Bakuplus.az xəbər verir ki, Dilarə Kazımova mahnısı Hollivud filmində səslənən ilk azərbaycanlı müğənni olub və bununla Azərbaycan musiqisini beynəlxalq kino layihəsində təmsil edib.
Filmin saundtrekinə daxil edilən "Dəli" mahnısının sözləri və musiqisi Fidan Alivaya məxsusdur. Bildirilir ki, dinamik ritmli "Dəli" mahnısının səsləndirildiyi filmin büdcəsi təxminən 32 milyon dollardır.
Maraqlıdır ki, mahnı filmdə hadisələrin Bakı ilə əlaqəli olduğu epizodda səslənir. Dialoqlarda Azərbaycanın paytaxtının adı çəkilir və personajlardan biri digərini "Bakıya xoş gəlmisiniz" sözləri ilə salamlayır.
Qeyd edək ki, açıq mənbələrdə filmin Bakıda çəkildiyi barədə məlumat yoxdur. Filmin istehsal məkanları kimi başqa şəhərlərin adları qeyd olunur. Bu səbəbdən ekran əsərindəki Bakı görüntülərinin digər çəkiliş məkanlarında yaradıldığı ehtimal edilir.
