Sosial şəbəkələrdə yayılan bəzi görüntülər cəmiyyətin ciddi narazılığına səbəb olub.
Bakuplus.az-ın məlumatına görə, Bakının ürəyi sayılan və tarixi əhəmiyyətinə görə YUNESKO-nun Dünya Mədəni İrsi siyahısına daxil edilən İçərişəhərin qala divarlarının Sabir bağı yaxınlığında yerləşən hissəsi sosial mediada mənasız və uydurma iddiaların hədəfinə çevrilib.
Təqdim etdiyimiz görüntüləri paylaşan sosial şəbəkə istifadəçilərinin bəziləri əzəmətli qala divarlarında tarix boyu oyulmuş naxışlardan birini – sadə bir üçbucaq formasını – "YouTube" platformasının loqosuna bənzədir. Daha da təəccüblüsü odur ki, bu əsassız iddia ilə çıxış edənlər bunun guya müasir dövrdə kimlərsə tərəfindən daşların üzərinə sonradan əlavə etdiyini söyləyirlər.
Bu cür qeyri-ciddi, tarixi və elmi əsasdan tamamilə uzaq iddialar, həm ölkənin mədəni irsinə qarşı hörmətsizlik, həm də ictimai şüurun səviyyəsinə təhqirdir. Yüzillərlə ayaq üstə qalmış, memarlıq və tarix baxımından bənzərsiz olan qala divarlarını sosial media "kontenti" uğrunda alçaltmaq və gülünc bənzətmələrlə gözdən salmaq cəmiyyətin mədəni yaddaşına açıq hücumdur.
Aqil Cavidov
