Abşeron Rayon Məhkəməsində xuliqanlıqda və satış məqsədi olmadan qanunsuz olaraq narkotik vasitələri saxlamada təqsirləndirilən Fərid Qafarovun (soyadı şərtidir) cinayət işi üzrə məhkəmə istintaqı yekunlaşıb.
Pravda.az xəbər verir ki, hakim Cəmilə Səfiyevanın sədrliyi ilə keçirilən prosesdə hökm oxunub.
Məhkəmənin hökmü ilə F.Qafarov 2 il 6 ay 26 gün müddətinə azadlıqdan məhrum edilib.
Hadisə 2024-cü ildə Abşeron rayonu Mehdiabad qəsəbəsində baş verib.
Fərid Qafarov tanışı zərərçəkmiş Əli Budaqovla (soyadı şərtidir) mübahisə edib. Buna səbəb isə zərərçəkmişin onun və tanışlarının ünvanına nalayiq sözlər işlətməsi olub. Fərid də Əlini söyüb, əlindəki bıçaqla onun bel və bud nahiyələrinə zərbələr vuraraq xəsarət yetirib.
Fərid Qafarov 6 fevral 2025-ci il tarixdə saat 10:50-də Abşeron rayonu Mehdiabad qəsəbəsində polis əməkdaşları tərəfindən saxlanıb. Təqsirləndirilən şəxsin əynindəki şalvarının sağ yan cibindən çəkisi 0.486 qram olan kustar üsulla hazırlanmış psixotrop maddə - metamfetamin aşkar edilərək götürülüb.
Qeyd edək ki, Əli Budaqov məhkəmədə səkkiz yaşından yaşadığı qəsəbədə heyvan saxladığını, saxladığı heyvanların sahiblərindən pul alaraq dolandığını bildirib.
