Avstraliyanın Melburn Universitetində Bədii və Sənədli Filmlər üzrə Prodüserlik magistr proqramında təhsil alan azərbaycanlı tələbə Afaq Yusiflinin təhsil haqqının ödənilməsi ilə bağlı problem yaşadığı bildirilmişdi.
Bakuplus.az-ın məlumatına görə, sosial şəbəkələrdə tələbəyə yardım edildiyi və məsələnin həll olunduğu barədə məlumat yayılıb.
Afaq Yusifli isə yayılan məlumatların onunla rəsmi şəkildə paylaşılmadığını deyib. O bildirib ki, ödənişin necə və kim tərəfindən ediləcəyi, həmçinin universitetə hansı rəsmi sənədi təqdim etməli olduğu barədə ona məlumat verilməyib. Tələbəyə yalnız məsələdən xəbərdar olduqları və problemin həll ediləcəyi bildirilib.
A.Yusifli məsələnin artıq həll olunduğu barədə yayılan məlumatın doğru olmadığını vurğulayıb və məsələ ilə bağlı konkret məlumatın onunla da paylaşılmasını istəyib.
Qeyd edək ki, daha əvvəl Afaq Yusifli təhsil haqqının bir hissəsinin ödənilməməsi səbəbindən Melburn Universitetindən xəbərdarlıq aldığını bildirmişdi. Onun sözlərinə görə, təhsil haqqı üçün nəzərdə tutulan 25 500 manat 2025-ci ilin dekabrında Azərbaycan Kinematoqrafçılar İttifaqına ayrılıb, lakin vəsait universitetə köçürülməyib.
