Bakının Mətbuat prospektində ağacların kəsilməsi ilə bağlı Dövlət Ekoloji Təhlükəsizlik Xidmətinə ünvanladığımız sorğuya cavab verilib.
Dövlət Ekoloji Təhlükəsizlik Xidmətindən Bakuplus.az-a bildirilib ki, Yasamal rayonu, Mətbuat prospektində ağacların kəsilməsi ilə bağlı daxil olan şikayət 11 saylı Regional Ekologiya və Təbii Sərvətlər İdarəsinin əməkdaşları tərəfindən araşdırılıb.
Araşdırma zamanı ərazidə 14 ağacın qanunsuz kəsildiyi müəyyən edilib. Bildirilib ki, bunun nəticəsində təbiətə 5280 manat məbləğində ziyan dəyib və faktla bağlı akt tərtib olunub.
Qeyd olunub ki, dəymiş ziyanın məbləği cinayət tərkibi yaratdığından məsələyə hüquqi qiymət verilməsi və təqsirkarların müəyyənləşdirilməsi məqsədilə toplanmış materialların Baş Prokurorluğa göndərilməsi hazırlanır.
Həmçinin kəsilmiş ağacların əvəzinə yeni ağacların əkilməsi və mövcud yaşıllıqlara aqrotexniki qulluq göstərilməsi üçün Yasamal Rayon İcra Hakimiyyətinə və Yaşıllaşdırma Təsərrüfatı Birliyinə müraciət edilib.
Qeyd edək ki, sakinlər daha əvvəl Bakuplus.az-a müraciət edərək Mətbuat prospektində yol kənarındakı ağacların kəsildiyini bildirmişdilər.
