2022-ci il sentyabrın 13-də Ermənistan Silahlı Qüvvələri tərəfindən törədilən genişmiqyaslı təxribatın qarşısının alınması zamanı Kəlbəcər rayonu ərazisində şəhid olan Səbuhi Əhmədovun məzarı ziyarət olunub.
Unikal.az-ın məlumatına görə, şəhidimizlə birgə SOS Uşaq Evində böyüyən Günel Hüseynova açıqlamasında onun dostu olduğunu bildirib:
"SOS Uşaq Evinin yetirməsiyəm. Səbuhi Əhmədovla bir yerdə böyümüşük. O, 44 günlük Vətən müharibəsində cəsarətlə döyüşüb. Səbuhi müharibə zamanı müxtəlif dərəcəli bədən xəsarətləri almasına baxmayaraq, sonrakı döyüşlərə də qatıldı. Onun timsalında bütün şəhidlərimizə Allah rəhmət eləsin!
Mən fəxr edirəm ki, o, Polad Həşimov, Cəbrayıl Dövlətzadə, Mübariz İbrahimov və digərləri kimi mərdcəsinə döyüşərək Vətən uğrunda şəhid oldu".
Xatırladaq ki, Azərbaycan Ordusunun şəhid giziri Səbuhi Əhmədov 21 dekabr 1996-cı ildə Şəki şəhərində doğulub. Valideyn himayəsindən məhrum olan Səbuhi Əhmədov "SOS Uşaq Kəndləri – Azərbaycan"ın sakini olub. Bakı şəhərində yerləşən 269 saylı tam orta məktəbdə və Bakı Qida Sənayesi Kollecində təhsil alıb.
Azərbaycan Prezidenti İlham Əliyevin 18.12.2020-ci il tarixli Sərəncamına əsasən "Cəsur döyüşçü" medalı və "Azərbaycan Bayrağı" ordeni ilə təltif edilib.
14 sentyabr 2022-ci ildə Bakıda İkinci Şəhidlər Xiyabanında dəfn edilib.
