Bu gün Xalq artisti Şəfiqə Axundovanın doğum günüdür. Onun anadan olmasından 102 il ötür.
Görkəmli bəstəkar 1924-cü ildə Şəkinin sayılıb-seçilən Axundovlar ailəsində dünyaya göz açıb. Atası Qulam Axundov dövrünün tanınmış ziyalısı idi. Müəyyən illərdə partiya işində, rəhbər vəzifələrdə çalışmışdı. Anası Züleyxa xanım isə evdar qadın idi.
O, Bakıdakı 173 saylı məktəbdə təhsilini davam etdirərkən musiqi məktəbinə də daxil olur. Şəfiqə Axundova şərqdə ilk opera yazan qadın bəstəkar kimi tarixə düşüb.
1972-ci ildə səhnəyə qoyulan "Gəlin qayası" operası onun yaradıcılığının zirvəsi hesab olunur və Azərbaycan operasının inkişafında mühüm mərhələdir.
Bəstəkarın yaradıcılığı təkcə opera ilə məhdudlaşmır. O, çoxsaylı mahnılar, romanslar, instrumental əsərlər bəstələmiş, musiqilərində milli melodiyaları klassik üslubla ustalıqla birləşdirib.
Onun həyatı şəxsi faciələrdən də yan keçməyib. Şəfiqə Axundova yeganə övladının vəfatı ilə ağır itki yaşayıb. Onun oğlu Taleh Hacıyev də istedadlı bəstəkar və pianoçu idi. O, yaradıcılığının ən parlaq vaxtında, gənc yaşlarında ruhi xəstəliyə tutulub. Bu da onun həm sağlamlığına, həm də psixoloji durumuna çox pis təsir edib. Uzun müddət bu xəstəliklə mübarizə aparsa da, 19 iyul 2008-ci ildə Maştağada yerləşən ruhi əsəb xəstəxanasında vəfat edib.
Bu faciə bəstəkarın həyatında dərin iz buraxıb, lakin o, bütün ağrı-acılara baxmayaraq yaradıcılıqdan uzaqlaşmayıb və musiqi ilə yaşamağa davam edib.
Mərhum bəstəkar 26 iyul 2013-cü ildə vəfat edib. O, II Fəxri xiyabanda dəfn olunub.
