Xəzər Rayon Məhkəməsində qəsdən sağlamlığa yüngül zərər vurmada təqsirləndirilən Akif Hümbətovun (adı, soyadı şərtidir) cinayət işi üzrə məhkəmə istintaqı yekunlaşıb.
Pravda.az xəbər verir ki, sonuncu keçirilən prosesdə qərar elan edilib.
Məhkəmənin qərarı ilə Akif Hümbətov zərərçəkmiş şəxslə barışdığı və dəymiş ziyanı tamamilə ödədiyi üçün həmin Məcəllənin 128-ci maddəsi ilə nəzərdə tutulmuş cinayət məsuliyyətindən azad edilib və barəsində olan böyük ictimai təhlükə törətməyən aşkar cinayətlər üzrə məhkəməyədək sadələşdirilmiş icraata xitam verilib.
İttihama görə, hadisə bu il paytaxtın Xəzər rayonu, Şüvalan qəsəbəsi ərazisində qeydə alınıb.
Belə ki, Akif Hümbətov evdə gəlini, zərərçəkmiş Səmayə Hümbətova (adı, soyadı şərtidir) ilə aralarında mübahisə yaranıb. Mübahisə zamanı təqsirləndirilən şəxs qadının sifət və bədən nahiyələrinə bir neçə dəfə qəsdən şillə vurub. Nəticədə Səmayə xəsarət alıb. Məhkəmə-tibbi ekspertizasının rəyinə əsasən, həmin xəsarətlər sağlamlığa qəsdən yüngül dərəcəli zərərvurmaya aid edilib.
Məhkəmənin hazırlıq iclasında Akif Hümbətov və Səmayə Hümbətova barışdıqlarını bildirərək məhkəməyə ərizə təqdim ediblər və məhkəməyədək sadələşdirilmiş icraat üzrə işə xitam verilməsini xahiş ediblər.
