Əlisgəndər Hacıbaba oğlu Cəfərzadə 14 oktyabr 1875-ci ildə Bakı şəhərində anadan olub. [https://www.medeniyyet.az/page/news/54317/.html]
Cəfərzadə 1887-1890-cı illərdə Bakıda məhəllə və ilk xüsusi rus-müsəlman məktəbində oxuyub. 1895-1898-ci illərdə o, Nəriman Nərimanovun təşkil etdiyi qiraətxanada müdir vəzifəsində çalışıb. 1897-ci ildə Cəfərzadə imperator III Aleksandr kişi gimnaziyasında imtahandan keçərək, Azərbaycan dili müəllimi işləmək hüququnu alıb və 1920-ci ilə kimi Aleksey ali ibtidai məktəbində çalışıb. [Azərbaycan Xalq Cümhuriyyəti Ensiklopediyası. I cild. Bakı-2004]
1906-1918-ci illərdə o, “Nəşri-maarif” cəmiyyətinin katibi seçilib və həmin cəmiyyətin açdığı ibtidai məktəblərin müəllim kadrları, dərslik və metodik vəsaitlərlə təmin olunması işinə rəhbərlik edib. Cəfərzadə 1906-1908-ci illərdə “Dəbistan” adlı ilk pedaqoji jurnalın naşiri və mühərriri olub. [Savalan Fərəcov. “Dəbistan”la başlanan yol. Mədəniyyət.- 2014.- 16 aprel]
O, bədii və elmi yaradıcılıqla da məşğul olub. Cəfərzadə Əlişir Nəvai, Seyid Əzim Şirvani, Əli bəy Hüseynzadə, Əlişir Nəvai və maarifçi Həsən bəy Zərdabi kimi şəxsiyyətlərin həyatları haqqında məqalələr dərc edib. O, həmçinin uşaqlar üçün “Balaca Firidun”, “Ata və oğul”, “Mərhəmətli Fatma”, “Cəmilənin sərgüzəşti” hekayələrinin, “Kilidiədəbiyyat” dərsliyinin müəllifi olub. [Azərbaycan Xalq Cümhuriyyəti Ensiklopediyası. I cild. Bakı-2004]
Əlisgəndər Cəfərzadə 28 yanvar 1941-ci ildə vəfat edib.
