Bakıda qonşusunun sözü ilə qızı Rəna Cavadovanı bıçaqlayan Rəfail Cavadovun cəzası yüngülləşdirilib.
Teleqraf.аz-ın əldə etdiyi məlumata görə, bununla bağlı zərərçəkmiş şəxs kassasiya şikayəti verib.
Rəna Cavadova kassasiya şikayətini onunla əsaslandırıb ki, atası onu öldürmək istəməyib. Atası məhkəmə istintaqında dindirilən zaman Rənanı öldürmək deyil, qorxudaraq cəzalandırmaq niyyətini bildirərkən tam həqiqəti söyləyib.
İstintaq orqanı və məhkəmələr nəticəyə gəlib ki, Rəfail Cavadov qızını öldürmək məqsədilə bu əməlləri törədib. 5 bıçaq zərbəsi alan Rəfail Cavadovun qızı isə hesab edir ki, atasının əməli qəsdən adam öldürməyə cəhd kimi deyil, qəsdən sağlamlığa ağır zərər vurma kimi nəzərə alınmalıdır.
Məhkəmə kollegiyası işin materiallarını öyrənib, kassasiya şikayətinin dəlillərini araşdırıb, proses iştirakçılarının çıxışlarını dinləyərək hesab edib ki, şikayət qismən təmin olunmalı, apellyasiya instansiyası məhkəməsinin qərarı dəyişdirilməlidir. Nəticədə Rəfail Cavadovla bağlı 11 il 3 aylıq həbs cəzası dəyişdirilib. Onun cəzası qızının şikayətindən sonra 7 il 10 aya endirilib.
Qeyd edək ki, hadisə Bakının Qaradağ rayonunun Lökbatan qəsəbəsində baş verib. İstintaq zamanı müəyyən edilib ki, qonşusu Rəfail Cavadova qızının əxlaqsız həyat tərzi keçirdiyini söyləyib. Buna görə, Rəfail Cavadov qızını öldürmək qərarına gəlib. Bu məqsədlə ata qızına 5 bıçaq zərbəsi endirib. Yaranmış səs-küy zamanı evə daxil olan digər qonşu qadın Rəfail Cavadovu arxadan tutaraq saxlayıb, nəticədə, Rəna Cavadova ölümdən xilas olub.
