Bakı real məktəbi Bakıda, İçərişəhər metrosunun yanında, İstiqlaliyyət küçəsi, 6-da yerləşib. Məktəbin binası 1901-ci ildə inşa olunub. Binanın memarı rus mühəndisi Dmitri Buynov olub. [https://pastvu.com/p/310805]
Bakı real məktəbi 1874-cü ildə Bakı real gimnaziyasının əsasında yaradılmışdır. Əvvəllər gimnaziya Qubernskaya (indiki Nizami) küçəsindəki binada yerləşirdi. 1891-ci ildə Şəhər Duması real məktəbin binasının tikintisi üçün keçmiş Nikolayevskaya küçəsində sahə ayırdı. Onun layihəsi hələ 1892-ci ildə Bakı qubernatoruna təqdim edilmiş, lakin nöqsanlara görə layihə qəbul edilməmişdir. Mühəndis Buynovun tərtib etdiyi real məktəbin layihəsi 1900-cü illərin əvvəllərində təsdiq edilmişdir. [Бакинское реальное училище — OurBaku] [https://bakucity.preslib.az/az/page/J3KPlhnUsM]
Məktəbdə təbiət və dəqiq elmlərin öyrənilməsinə xüsusi diqqət yetirilirdi. Burada şagirdlərin sərbəst müşahidələr apardığı meteoroloji stansiya mövcud idi. Məktəbin əsas cihazları və dərslikləri şagirdlər tərəfindən hazırlanırdı. Onların əmək, rəsm, modelləşdirmə işləri Rusiya və Qafqazda keçirilən sənaye və incəsənət sərgilərində dəfələrlə nümayiş etdirilirdi və mükafatlar qazanırdı. Məktəbdə məşhur Litva yazıçısı V.İ.Mitskeviçin rəhbərlik etdiyi ədəbi və ifadəli qiraət dərnəkləri fəaliyyət göstərirdi.
Şagirdlərin müəyyən hissəsi dövlət hesabına təhsil alırdı. Bakı milyonçusu Musa Nağıyev məktəbə maliyyə yardımı edirdi. Nəriman Nərimanov, Həsən bəy Zərdabi Bakı real məktəbində dərs deyirdilər. [Azərbaycan Milli Ensiklopediyası. III cild. Bakı-2011]
Bakı real məktəbi 1920-ci ilə qədər mövcud olmuşdur, sonra Azərbaycan SSR Xalq Maarif Komissarlığı yanında Bakı Xalq Maarifi İdarəsinin tabeliyinə keçmişdir. Sonralar binada Azərbaycan Dövlət Universiteti yerləşirdi. Universitet yeni binaya köçürüldükdən sonra bu bina Xalq Təsərrüfatı İnstitutuna (Narxoz) verilib.
Hazırda binada Azərbaycan Dövlət İqtisad Universiteti (UNEC) fəaliyyət göstərir.
