SSRİ Xalq artisti Müslüm Məhəmməd oğlu Maqomayev 17 avqust 1942-ci ildə Bakıda anadan olub. O, Bakı Konservatoriyasının musiqi məktəbində (indiki Bülbül adına Musiqi Məktəbi) fortepiano və bəstəkarlıq ixtisası üzrə təhsil almış, Asəf Zeynallı adına Bakı Musiqi Kollecində təhsilini davam etdirmişdir.
O, ilk uğurunu 19 yaşında Helsinkidə, VIII Ümumdünya Festivalında qazanıb və orada medalla təltif olunub.
1961-ci ildə Müslüm Maqomayev Bakı hərbi dairəsinin mahnı və rəqs ansamblının solisti olub. 1963-cü ildə o, Kreml sarayında “Buxenvald harayı”nı ifa etdikdən sonra Sovet İttifaqında məşhurlaşıb, həmin il Azərbaycan Dövlət Akademik Opera və Balet Teatrının solisti kimi fəaliyyətə başlamışdır. 1975-ci ildə Müslüm Azərbaycan Dövlət Estrada Simfonik Orkestrinin bədii rəhbəri təyin olunub.
Müğənninin repertuarına 600-dək əsər daxildir. Bu ifaların arasında “Azərbaycan”, “Ana”, “Свадьба”, “Синяя вечность”, “Bella, ciao!”, “Королева красоты” və s. kimi mahnılar var. Müslüm Maqomayev, həmçinin müxtəlif filmlərdə oynayıb.
O, SSRİ “Qırmızı Əmək Bayrağı” və “Xalqlar Dostluğu” ordenləri ilə təltif edilib, SSRİ-nin “Xalq artisti” adına layiq görülüb. O, həmçinin Azərbaycan Respublikasının “Şöhrət” və “İstiqlal” ordenləri ilə təltif edilib.
Müslüm Maqomayev 25 oktyabr 2008-ci ildə Moskvada, ürək tutmasından vəfat edib. O, Bakıda, I Fəxri Xiyabanda dəfn edilib.
