Əbdülhəsən Əbdülməhəmməd oğlu Almaszadə 24 mart 1907-ci ildə Bakının Qala kəndində anadan olub. Əbdülhəsəni uşaqlıqdan babasının adı ilə - Almas çağırardılar. Şeirlərini Almas İldırım adı ilə dərc etdirdiyinə görə bu adla məşhurlaşmışdır. [Almas İldırım. Seçilmiş əsərlər. Bakı-2004] [http://www.anl.az/down/meqale/adalet/2018/aprel/585938.htm]
1914-1915-ci illərdə Almas Bakıda fəaliyyət göstərən, İran hökuməti tərəfindən maliyyələşdirilən “İttihad” məktəbində, 1925-ci ildən isə Abdulla Şaiqin “Nümunə” məktəbi kimi tanınan 12-ci Bakı Gimnaziyasında təhsil alıb. Məktəbdə oxuduğu illərdə Hüseyn Cavid, Əhməd Cavad, Cəfər Cabbarlı kimi şair və yazıçılarla tanış olub. Almas İldırım Əhməd Cavadı ozünə ustad bilirdi. Almas burada Mikayıl Müşfiqlə tələbə yoldaşı olmuşdur.
Gənc şair Əhməd Cavad və Hüseyn Cavidin təşəbbüsü ilə yaradılan və gizli fəaliyyət göstərən “Yaşıl yarpaq” dərnəyinin, daha sonra “Ədəbiyyat Cəmiyyəti”nin üzvü olub. [Salmanlı R. Almas İldırım.Ədalət.-2018.-17 aprel.-S.7.]
1928-ci ildə şair “millətçi” damğası ilə Dağıstana sürgün edilir. Eyni zamanda Almas İldırımı “xırda burjua yazıçısı” adlandıraraq Azərbaycan Proletar Yazıçılar Cəmiyyətindən xaric edirlər. Azərbaycan Proletar Yazıçılar Cəmiyyətinin sədri Mustafa Quliyev yazırdı: “Yazıçılar arasında musavatçılara aşiq və Türkiyə çavuşlarının həqiqi şagirdi bilinən Almas İldırım yer almış olduğu meydana çıxmaqdadır. Bunlar Əhməd Cavad və Hüseyn Cavidlərin yolçusudurlar. Milli ədəbiyyat yaratmaq məqsədilə qəmli mərsiyələr yazan bu kimi gənc şairlərdən ədəbiyyatımızı təmizləməliyik”. [Salmanlı R. Almas İldırım.Ədalət.-2018.-18 aprel.-S.7.]
Dağıstandan sonra onu Krıma və oradan Türkmənistana sürgün edirlər. Təzyiqlərə dözə bilməyən Almas İrana qaçır. Orada şair hərbçilər tərəfindən saxlanılır, sovet casusu adı ilə 25 gün soyuq suyun içində saxlanılaraq işgəncə görüb, böyrək xəstəliyinə tutulur. Azadlığa çıxdıqdan sonra Türkiyəyə köçür və burada jurnalist kimi çalışır.
1936-cı ildə Almasın əkiz oğlanları dünyaya gəlir. Şair birinə Eldəgəz, digərinə isə Yurdavar adını qoyur. Akademik Bəkir Nəbiyevin sözlərinə görə: “Ata öz ovladlarına verdiyi bu nadir adlarla onlara özünün ən böyük tapşırığını təmin etmək istəmişdi: yəni onlar, övladları mütləq yurda, Vətənə varmalı, eldə, obada gəzməlidirlər!”
Almas İldırım “O mənimdir əzəldən”, “Əlvida, Bakı”, “Yaralı olmasaydı”, “Qərib quşuma”, “Əsir Azərbaycanım” kimi şeirlərin müəllifidir. [Almas İldırım. Seçilmiş əsərlər. Bakı-2004]
Almas İldırım 14 yanvar 1952-ci ildə Türkiyədə vəfat edib.
Bakının Şüvəlan qəsəbəsində Almas İldırımın adını daşıyan küçə vardır.
