QOÇ bürcü
Bu həftə Qoçun qarşısına Əqrəb, Əkizlər və ya Xərçəng bürcünün nümayəndəsi çıxa bilər: ulduzlar sizi sevgi sınağına çəkəcək. Sizin könlünüzü almaq istəyən bu şəxslərə “yox” deməyin, bir şans verin, bəlkə də ən xoşbəxt günləri onunla yaşayacaqsınız. Karyeranızda dəyişikliklərə hazır olun, çünki parlaq, sevincli günlər başlayır. Gözəlliyi, yaraşıqlığı ilə seçilən bu bürc çox insanların qəlbini fəth edəcək. Həftənin sonuna cibinizi boşaldanlar olacaq: saf olmayın, sizdən istifadə edənlər var. Uğurlu günləriniz 25, 26 mart, uğursuz gününüz isə 30 martdır.
BUĞA bürcü
Bu həftə Buğa hamıya od qoyacaq. Buğanın ağlına, bacarığına şübhə edən insanlar onun uğruna mat-məəttəl qalacaqlar. Elə bir ucalara qalxacaqsınız ki, hamı sizə heyran qalacaq: adınız dillərdən düşməyəcək. Amma bu, bürcün çalışqan nümayəndələrinə aid olacaq: tənbəllər isə indi tutduqları mövqedən bir santimetr belə tərpənməyəcəklər. Sevgililər, sizi münasibət sınağı gözləyir: aldanmalar, qısqanclıq və hətta dava belə baş verə bilər. Uğurlu günləriniz 26, 30 mart, uğursuz gününüz isə 27 martdır.
ƏKİZLƏR bürcü
Həftəni xoş əhvali-ruhiyyə ilə açacaqsınız: aylardır gözlədiyiniz xəbəri alacaqsınız. Həftəiçi qohumlarla, köhnə dostlarla görüşəcəksiniz: kefiniz saz olacaq. Yeni işə başlamaq, biznes qurmaq üçün gözəl vaxtdır. Həftəsonu sağlamlığınızda kiçik problemlər yarana bilər: bunun qarşısını almaq üçün bol vitamin qəbul edin, vaxtlı-vaxtında yatın və stresdən uzaq olun. Həftəsonu maddi durumunuz xeyli yaxşılaşa bilər. Ulduzlar sizin qarşınıza bir neçə namizəd çıxaracaq: altıncı hissinizə güvənin və seçiminizi edin. Uğurlu günləriniz 29, 31 mart, uğursuz gününüz isə 25 martdır.
XƏRÇƏNG bürcü
Sevgilinizə nəzarət etməyiniz xoş sonlanmayacaq: “bomba partlayacaq” və hər iki tərəf ziyan görəcək. Son günlər bürcün passivləşən bəzi nümayəndələri özlərini ələ almalı və maddi durumlarını yaxşılaşdırmaq üçün yeni ideyaları ortaya qoymalıdırlar. Kreativliyi ilə bürclər arasında seçilən Xərçəng istəsə, milyonçu də ola bilər: sadəcə tənbəlliyə son qoymaq lazımdır. Bəzi Xərçənglər dürüst olmayan bir insanla qarşılaşacaqlar və aldanmaq riski ilə üzləşəcəklər. Sevgiliniz tərəfindən kiçik sürprizlər gözləyin: bu, xoş xəbər və ya maraqlı hədiyyə ola bilər. Uğurlu günləriniz 25, 29 mart, uğursuz gününüz isə 31 martdır.
ŞİR bürcü
Bu həftə Şir boş vaxt tapmayacaq: iş görüşləri ilə dolu günlər olacaq. Pul qazanmaq üçün əsl vaxtdır: hansı işlə məşğul olmaq istəsəniz, sonu uğurlu olacaq. Yalançıların, üzünüzə gülüb arxanızca danışanların, sizə paxıllıq edənlərin əsl üzünü görəcəksiniz. Həftəiçi böyük uğurunuz alqışlara səbəb olacaq: hamı sizdən danışacaq. Cibiniz pulla dolacaq, buna görə də illərdir görmədiyiniz qohumlar və “dostlar” başınıza yığışacaqlar. Bu yaxınlarda Şirin “başını bağlamaq” fikriniz varsa, məsləhət görürük, bundan vaz keçəsiniz: bu bürc “Subaylıq sultanlıqdır” şüarı ilə yaşayır. Uğurlu günləriniz 28, 30 mart, uğursuz gününüz isə 25 martdır.
QIZ bürcü
Bu həftə karyeranızda müsbət dəyişikliklər baş verəcək: illərdir çəkdiyiniz əziyyət yerdə qalmayacaq və vəzifəniz artacaq. Bir nəfər sizə quyu qazmağa başlayacaq: nə vaxtsa kiminsə yolunu keçmisiniz və o, qisas planı qurub. Lakin bunu hiss edəcəksiniz və o insanı tapıb darmadağın edəcəksiniz. Yaxınlarınızdan birinə diqqət yetirin: o, təhlükə altına düşə, siz isə onu xilas edə bilərsiniz. Nifrət etdiyiniz bir insan yaxın gələcəkdə sizin sevgiliniz olacaq: heç vaxt “heç vaxt” deməyin. Uğurlu günləriniz 25, 27 mart, uğursuz gününüz isə 28 martdır.
TƏRƏZİ bürcü
Bu həftə intriqalarla dolu günlər olacaq: sizi sevən etiraf, sizi sevməyən dedi-qodu edəcək, arxanızca işlər görəcəklər. Həftəni işinizdə xoş xəbərlə açacaqsınız: bu, ya vəzifə yüksəlişi, ya da maaş artımı ola bilər. Dostunuzdan sizin həyatınızı dəyişəcək inanılmaz xoş xəbər eşidəcəksiniz. Sevgisini göstərməkdən çəkinən Tərəzi ətrafındakı dostlarını itirə bilər. Lakin o, içdən sevir: öz sevgisini büruzə verməsə belə, çox güvənli dostdur. Uğurlu günləriniz 29, 30 mart, uğursuz gününüz isə 31 martdır.
ƏQRƏB bürcü
Həftəiçi siz yeni işlə məşğul olmağa başlayacaqsınız: dəyişiklik sizə yeni imkanlar gətirəcək. Həyatınız yaxşıya doğru dəyişəcək, yeni dostlar qazanacaqsınız. Sevgiliniz tərəfindən kiçik, xoş sürprizlər alacaqsınız. Həftəsonu zəngin və maraqlı keçəcəyini vəd edir. Gördüyünüz ən xırda işə belə başdan-ayağa köklənmək məcburiyyətində qalacaqsınız, ona görə də şəxsi işlərə, demək olar ki, vaxt qalmayacaq. Xəstəlikdən əziyyət çəkənlər şəfa tapacaqlar: qarşınıza sizi sağaldacaq mütəxəssis çıxacaq. Uğurlu günləriniz 26, 27 mart, uğursuz gününüz isə 28 martdır.
OXATAN bürcü
Həftəsonu yaxın bir insan sizə yığılmış gərginlikləri unutduracaq: onunla çox gözəl vaxt keçirəcəksiniz. Subay Oxatan emosional şok yaşaya bilər: dünən dost bildiyi bir insan ona sevgi etirafı edəcək. Maddi durumunuz yavaş-yavaş yaxşıya doğru dəyişəcək. Çərşənbədən uğurlu günləriniz başlayacaq və birdən-birə karyeranız üçün yeni perspektivlər yaranacaq. Həftəsonu dostlarınızla kiçik münaqişə yaşana bilər: diliniz sizin bəlanızdır. Əgər sizi sevən birinə “yox” desəniz, o, sizi qaçırmağa çalışacaq. Uğurlu günləriniz 25, 26 mart, uğursuz gününüz isə 30 martdır.
OĞLAQ bürcü
Bu həftə sizi uzun müddət narahat edən problem həll olunacaq. Həyatın yaxşılaşdığını hiss edəcəksiniz, planlaşdırdığınız işlərdə uğur qazanacaqsınız. Çərşənbə axşamı həyatınıza fırtına daxil olacaq və güzəranınızı qarma-qarışıq edəcək. Lakin qorxmayın, fırtına özü ilə daha çox uğur gətirəcək. Çalışın, rəhbərliyin etimadını doğruldun: yaltaqlıqla deyil, öz işinizlə nə qədər vacib əməkdaş olduğunuzu sübut edin, onda qarşınızda bir çox yeni imkanlar açılacaq. Uğurlu günləriniz 28, 31 mart, uğursuz gününüz isə 26 martdır.
DOLÇA bürcü
Həftəiçi Dolçalar enerji ilə dolu olacaqlar: bu günlərdə hansı işə başlamağınızdan asılı olmayaraq, mütləq uğur qazanacaqsınız. Həmkarlar tərəfindən zərbə ala bilərsiz: ağlınızda işlə əlaqədar plan varsa, çalışın, bu haqda hələ heç kimə deməyin, yoxsa ideyanız oğurlana bilər. Əlinizə pul gələcək, lakin onu lazımsız yerə xərcləsəniz, cibiniz bomboş olacaq. Odur ki, pulları ehtiyatla xərcləyin. Ulduzlar martın son günlərində Dolçalara gözlənilməz hədiyyə bəxş edəcək: bu haqda çoxdan düşünürdünüz və sevinciniz yerə-göyə sığmayacaq. Uğurlu günləriniz 25, 30 martdır, uğursuz gününüz gözlənilmir.
BALIQLAR bürcü
Həftə kifayət qədər sabit və sakit keçəcək. İntuisiya Balıqlara yaxın gələcəkdə çox vacib və əhəmiyyətli bir şeyin baş verəcəyinə işarə edəcək. Sevgilisi ilə münasibətdə problem yaşayanlar yeni dövrə keçəcəklər: davalara, münaqişələrə son qoyulacaq və Balıqlar, hətta evlənmək fikrinə də gələcək. Sinif yoldaşınızla qarşılaşacaqsınız: ondan sizə fayda dəyəcək və maraqlı təkliflər alacaqsınız. Maddi vəziyyətiniz xeyli artacaq, lakin daha çox pul qazanmalı, yeni layihələrə başlamalısınız. Uğurlu günləriniz 29, 31 martdır, uğursuz gününüz gözlənilmir.
