QOÇ bürcü
Bu həftə padşahlar, şahlar, sultanlar sizə paxıllıq edəcəklər: əlinizə elə bir şans düşəcək ki, hamı sizdən danışacaq. Varlı olmaq şansını qaçırmayın: həftəsonu sərfəli təklif ala bilərsiniz, bundan maksimum yararlanın. Subayların üzü güləcək: qarşınıza yaşılgöz, əsmər biri çıxacaq. Onunla münasibət qurub xoşbəxt anlar yaşayacaqsınız. Uğurlu günləriniz 30 sentyabr, 4 oktyabr, uğursuz gününüz isə 1 oktyabrdır.
BUĞA bürcü
Bu həftənin birinci yarısında Buğaların işdə qayğıları çox olacaq. Sizə elə gələcək ki, hər şey donub qalıb və onları yerindən tərpətmək mümkün deyil. Texnika xarab olur, həmkarlarınız birdən-birə sizinlə yola getmirlər, müdiriyyət isə bütün sazişləri pozur. Bütün bunlara maliyyə problemləri də əlavə olunacaq. Sizə elə gələcək ki, bir az əvvəl əlinizdə iri məbləğ var idi, amma indi onun heç izi-tozu da qalmayıb. İndi həyatınızda çətin dönəmdir, lakin səbir edin, növbəti həftə hər şey düzələcək. Uğurlu günləriniz 2, 3 oktyabr, uğursuz gününüz isə 5 oktyabrdır.
ƏKİZLƏR bürcü
Həftə xoş xəbərlə başlayacaq: bu xəbəri çoxdan gözləyirdiniz. Həyatınızın ən parlaq günləri başlayacaq, çünki uğur sizin tərəfinizdə olacaq. Arzu etdiyiniz iş özü sizin qarşınıza çıxacaq. Ətrafınızda olan bir insan sizə sürpriz hazırlayır: bu ya maddi hədiyyə, ya da sevgi etirafı ola bilər. Münasibətdə olan Əkizlər, partnyorunuzu qısqandırmağa çalışmayın, nə də buna şərait yaratmayın, əks halda sevgi nifrətə çevrilə bilər. Cümə günü maskalar atılacaq: arxanızca iş çevirən biri sizə qazdığı quyuya özü düşəcək. Uğurlu günləriniz 1, 4 oktyabr uğursuz gününüz isə 30 sentyabrdır.
XƏRÇƏNG bürcü
Xərçənglər hər bir şeyi ürəyinə salırlar, bu səbəbdən də tez-tez depressiyaya düşürlər. Bu həftə hər şeyi boş verin: heç kimə qulaq asmayın, ürəyiniz nə deyirsə, onu edin. Bundan sizə ancaq xeyir gələcək. Sizə yeni layihələr təklif olunacaq: özünüzə inanın və tapşırıqları yerinə yetirin, çünki sonda böyük cekpot qoparacaqsınız. Həftəsonu evlilik təklifi və ya sevgi etirafı gözləyin. Bu dövrdə uğursuzluq sizin qapınızı döyməyəcək: hər şey yağ kimi gedəcək. Uğurlu günləriniz 5, 6 oktyabr, uğursuz gününüz isə gözlənilmir.
ŞİR bürcü
Bu həftə sizi narahat edən problemlərə son qoyulacaq: yaxşı günlərə hazır olun. Ürəyinizin qapısını lazımsız insanlara açmayın, onlar sizə yaxın olub zəif yerinizi tapa, sonra isə sizə zərbə vura bilərlər. Odur ki, bəzən soyuqqanlı, ürəksiz görünmək daha yaxşıdır. Həftəsonu karyera yüksəlişinə bir pillə də yaxınlaşacaqsınız. Subaylar, sizə varlı bir insan talib çıxacaq: onun puluna aldanıb, dərhal razılıq verməyin. Onun iç dünyası kasıb ola bilər. Uğurlu günləriniz 30 sentyabr, 2 oktyabr, uğursuz gününüz isə 5 oktyabrdır.
QIZ bürcü
Bu həftə bir nəfərin xətrinə dəyəcəksiniz: sevgi, nifrət, kin sizi rahat yaşamağa qoymayacaq. Burada siz səhv olacaqsınız, lakin qürurunuz səhvinizi etiraf etməyə imkan verməyəcək. Çalışın, eşqi qəlbinizdə öldürməyin, bu sevgini nifrətə döndərməyin. İşinizdə böyük dəyişikliklər olacaq: çoxdandır məqsəd qoyduğunuz vəzifəyə doğru irəliləyəcəksiniz. Həftəsonu maddi durumunuza fikir verin: boş-boş xərclər sizin cibinizi boşaldacaq. Uğurlu günləriniz 5, 6 oktyabr, uğursuz gününüz isə 1 oktyabrdır.
TƏRƏZİ bürcü
Bu həftə müdiriyyət tərəfindən xoş sözlər, bonuslar gözləyin. Həftənin əvvəlində sizə vacib iş tapşırılacaq. Bu işin öhdəsindən uğurla gələcəksiniz və hamı sizə heyran olacaq. Həftəiçi münasibətdə olanlar qısqanclıqla üzləşəcəklər: sevgilinizin qədrini bilin, çünki onu sizin əlinizdən almaq istəyən çoxdur. Həftəsonu borc istəyənlər qapınıza düzüləcəklər: ürəyiaçıq olmayın, hamı sizdən istifadə edir. Evli olanlar, ailənizdə artım gözlənilir: həkimdən xoş xəbər alacaqsınız. Uğurlu günləriniz 1, 2 oktyabr, uğursuz gününüz isə 30 sentyabrdır.
ƏQRƏB bürcü
Bu həftə hədiyyələr və xoş sürprizlərlə dolu olacaq. Sizi gizli sevən dəli-divanə biri var: o, sizin yanınızdadır, amma siz “kor” olmusuz. Əqrəb ona qarşılıq verməyən birini sevir, amma onu sevənə dəyər vermir. Həftənin ortasında qohumlar sizdən zəli kimi yapışacaq və qanınızı içəcəklər. Səbəb isə sizin böyük pul əldə etməyiniz olacaq: hər kəs sizin uğurunuzdan bir parça qoparmaq istəyəcək. Həftəsonu liderlik keyfiyyətlərinizi göstərmək şansınız olacaq: yeni vəzifə almaq və ya müdir olmaq şansınız yüksəkdir. Uğurlu günləriniz 3, 6 oktyabr, uğursuz gününüz isə 1 oktyabrdır.
OXATAN bürcü
Həftənin başlanğıcı xoşunuza gələn insana sevgi etirafı etmək üçün çox əlverişlidir: hissləriniz cavabsız qalmayacaq. Həftəiçi planlaşdırılmamış səfərlər mümkündür, odur ki, pasportunuzu hazır saxlayın: bir də gördünüz, xaricə getməlisiniz. Evli olanların başı üstünü qara buludlar alacaq: qısqanclıq səbəbindən münaqişələr baş tutacaq. Pul yığmaq vaxtı gəldi: gələcəkdə digər ölkədə yaşamaq və ya birdəfəlik köçmək şansınız olacaq. Uğurlu günləriniz 30 sentyabr, 3 oktyabr, uğursuz gününüz isə 5 oktyabrdır.
OĞLAQ bürcü
Bu həftə xəyallarınıza dalmayın, real hədəflər müəyyənləşdirin. Alış-veriş edərkən tələsməyin; aldadılma ehtimalı yüksəkdir. Pulunuzu qənaətlə istifadə edin və lazım olmayan şeylərə xərcləməyin. Həftə sonu yaxınlarınızla kiçik mübahisələr ola bilər, amma bunlar ciddi problemlərə yol açmayacaq. Bazar günü yeni və faydalı tanışlıqlar əldə edə bilərsiniz. Bəylər, həftəsonu tanımadığınız insanla dava düşə bilər: provokasiyaya getməyin. Uğurlu günləriniz 1, 3 oktyabr, uğursuz gününüz isə 6 oktyabrdır.
DOLÇA bürcü
Bu həftə çamadanınızı yığın – səyahət vaxtıdır! Həftəiçi xaricdə istirahət etmək təklifi ala və ya ekzotik ölkəyə səfər etmək üçün bilet uda bilərsiniz. Dostunuz başınıza bəla olacaq: ona görə davaya gedəcəksiniz, lakin oradan qalib kimi çıxacaqsınız. Sevgi cəbhəsində yeniliklər baş verəcək: dost bildiyiniz birinə diqqət yetirməyə başlayacaqsınız, onunla münasibətə başlamaq fikrinə gələcəksiniz. Maddi durumunuz yaxşılaşa bilər, əgər tənbəl olmasanız. Uğurlu günləriniz 4, 5 oktyabr, uğursuz gününüz isə 1 oktyabrdır.
BALIQLAR bürcü
Sizi sakit, ahəngdar bir həftə gözləyir. İşdə müdiriyyət sizə xoş münasibət bəsləyəcək və hətta vəzifənizi artırmaq barədə düşünəcək, lakin yaltaqlıq etməyin, özünüz kimi olun. Çoxdandır sizə quyu qazan həmkarınız var, onun gözü sizin nailiyyətlərinizi götürmür: Şir, Əqrəb və Dolça bürclərinin nümayəndələri olan iş yoldaşlarınızdan şübhələnin. Sevgiliniz sizə evlilik təklifi etmək istəyir, sadəcə lazımi vaxtı gözləyir: çalışın, ona hazır olduğunuzu bildirin. Uğurlu günləriniz 2, 5 oktyabr, uğursuz gününüz isə 4 oktyabrdır.
