27 Sentyabr - Anım Günü ilə əlaqədar Bakıda bir sıra mədəni-kütləvi tədbirlərin keçirilməsi nəzərdə tutulub. Bu haqda bu gün, 20 sentyabr tarixində Report məlumat verib.
23, 24 və 25 sentyabr Akademik Milli Dram Teatrında "Zəfər yolu" tamaşası nümayiş olunacaq.
27 sentyabr tarixində isə daha 6 tədbirin keçirilməsi nəzərdə tutulub:
- Azərbaycan Dövlət Akademik Musiqili Teatrında Vətən müharibəsinə həsr olunan "Bir nəfəs qədər" tamaşası təqdim olunacaq;
- Azərbaycan Musiqi Mədəniyyəti Dövlət Muzeyində Anım Günü ilə bağlı "Şəhidlər ölməz, Vətən bölünməz" adlı tədbir keçiriləcək;
- Leopold və Mstislav Rostropoviçlərin ev-muzeyində “Qəhrəmanımızı tanı!” adlı tədbir təşkil olunacaq. Görüşdə müharibənin qısa tarixi, şəhidlik zirvəsinə ucalan şəhidləri tanımaq və anmaq məqsədilə müharibənin canlı şahidləri olan qaziləri və şəhid ailələri iştirak edəcək;
- Səməd Vurğunun ev-muzeyində "44 günlük Vətən müharibəsi..." adlı tədbir və onlayn sərgi nəzərdə tutulub;
- Abdulla Şaiqin mənzil-muzeyində "Zəfərə aparan yol" adlı tədbir keçiriləcək;
- Nəriman Nərimanovun xatirə muzeyində "44 günlük zəfər tariximiz" adlı sərgi və “Açıq qapı” təşkil olunacaq.
