Bakının 3-cü mikrorayonunun dairəsi kimi tanınan Alı Mustafayev və Rövşən Cəfərov küçələrinin kəsişməsindəki körpünün altındakı hissə avtomobil dayanacağına çevrilib. Burada həm avtomobillər, həm də yük maşınları dayanır. Bu haqda bu gün, 27 noyabr tarixində Bakuplus.az Xəzər Xəbər-ə istinadən məlumat verir.
Körpülərin altında, eləcə də tunellərdə avtomobillərin saxlanması qadağan edilsə də, görünən mənzərə bunun əksini göstərir. Göstərilən yerdən dayanacaq kimi istifadə olunması nəinki yoldan keçənləri, hətta küçənin o biri tərəfində yerləşən evin sakinlərini də narahat edir.
Sakinlər deyirlər ki, gün ərzində burada nə siqnal səsindən, nə də rayonlara sərnişin götürən taksi sürücülərinin səsindən dinclik tapa bilirlər.
Sürücülər müsahibə verməkdən çəkinsələr də, məlum oldu ki, parkinq üçün bir manat ödəyirlər. Əvəzində sürücülərə heç bir qəbz verilmir.
Gün ərzində burada 100-dən çox avtomobil dayanır. Bu işi təşkil edən şəxslər açıqlama vermək istəməyiblər. Onlar ərazinin girişində şlaqbaum quraşdıraraq istənilən formada qanunsuz fəaliyyətlə məşğul olurlar.
“Yol hərəkəti haqqında” qanunun 52-ci maddəsinə əsasən, dəmir yolu keçidlərində, tunellərdə, habelə yerüstü keçidlərdə, körpülərdə və onların altında dayanmaq və durmaq qadağandır. Hər hansı sürücü bu qaydanı pozarsa, onu 20 manat cərimə gözləyir.
Daha öncə, iyun ayında Bakuplus.az analoji vəziyyətlə bağlı məlumat verib. Dərnəgül bazarı adlanan ərazinin yaxınlığında və prospektin Atatürk prospekti ilə kəsişməsində körpülərin altında analoji avtomobil dayanacaqları yaradılıb.
