Məsələ ilə bağlı Azərbaycan Yerüstü Nəqliyyat Agentliyindən (AYNA) Bakuplus.az-a açıqlama verilib:
“517 nömrəli müntəzəm marşrutda 14 avtobus 7-8 dəqiqə hərəkət intervalı ilə sərnişinlərə xidmət göstərir. Lakin günün əsasən səhər və axşam pik saatlarında marşrut avtobusunun keçdiyi Xırdalan şəhərində müşahidə edilən sıxlıq avtobuslar arasındakı intervalın artmasına səbəb olur”.
Həmçinin qurumdan bildirilib ki, daşıyıcıya nizamlı fəaliyyətin təmin edilməsi və sərnişin tələbatına uyğun olaraq xəttə əlavə nəqliyyat vasitələrinin cəlb edilməsi tapşırılıb.
***
15:20
Abşeron rayonu, Xırdalandan Masazır qəsəbəsi, “Yeni Bakı” yaşayış massivi istiqamətində və geriyə hərəkət edən 517 nömrəli marşrut xəttindən şikayət var.
Bakuplus.az-a müraciət edən sakinlər avtobuslar arasındakı intervalın həddindən artıq böyük olmasından, uzun-uzadı soyuq hava şəraitində dayanacaqda gözləmək məcburiyyətində qalmalarından, avtobus nəhayət gəlib çıxdıqda isə böyük izdiham səbəbindən bəzən salona daxil ola bilməmələrindən gileylənirlər.
“Avtobuslar arasında intervallar o qədər böyük olur ki, bəzən dayanacaqda soyuqda dayanan sərnişinlər bir-birindən marşrutun ləğv olunub-olunmamasını xəbər almağa başlayır. Təsəvvür edin ki, avtobusu 30 dəqiqə gözlədiyimiz vaxt da olub. Böyük intervalla hərəkət edən avtobuslar daim basabas olur, neçə-neçə sərnişin bir neçəsini buraxmaq məcburiyyətində qalır. 517-ni gözləyərək məsul şəxslərə 517 “dua edirik”. Sürücülərin özbaşınalığı isə ayrı bir dərddir. Kefləri istəyəndə sükan arxasında siqaret çəkirlər, kefləri istəyəndə telefonla danışırlar, kefləri də istəyəndə ümumiyyətlə dayanacaqda saxlamırlar”, - şikayətdə bildirilir.
Sakinlər avtobus sürücülərinin tez-tez yol hərəkəti qaydalarını pozmalarını da deyirlər:
“Avtobusu dayanacaq üçün müəyyən edilən yerdə deyil, hərəkət zolağında saxlayıb sərnişin düşürüb-mindirirlər. Bu səbəbdən həm sərnişinlərin həyatını təhlükəyə atırlar, həm də yolda süni tıxac yaranmasına səbəb olurlar”.
Şikayətçilər Azərbaycan Yerüstü Nəqliyyat Agentliyindən (AYNA) müvafiq tədbirlərin görülməsini tələb edirlər.
Məsələ ilə bağlı AYNA-ya sorğu ünvanlamışıq.
