Bakının Binə qəsəbəsinin “Kanal yolu” kimi tanınan ərazisində yaşayan 20 ailə içməli suya tələbatını maşınlara pul verib almaqla ödəyir. Bu haqda bu gün, 23 noyabr tarixində Bakuplus.az ATV-yə istinadən məlumat verir.
Sakinlərin sözlərinə görə, qonşu məhəllədəki su xətləri ilə onların arasında təxminən 300-400 metr məsafə var.
Sakinlərin aldıqları su bitəndə məcburən üz tutduqları istiqamət ərazidən keçən kanal olur. Kanal suyu ilə vedrələri doldurub evlərinə daşıyırlar ki, suya olan tələbatlarını təmin etsinlər.
“Paltarları ora suya çəkirik. Kanala da o şey yoxdur ki, atmayalar, hər şey atırlar. Aldığımız suyu da işlədirik, o da bizə çətinlik yaradır. Onda gərək biz həftədə bir dəfə su alaq, ona da gücümüz çatmır,” - deyə sakinlər narahatlığını bildirirlər.
Məsələ ilə bağlı “Azərsu” ASC-nin mətbuat katibi Anar Cəbrayıllı açıqlama verib: “Binə qəsəbəsinin hal-hazırda təxminən 30 faizi mərkəzləşdirilmiş qaydada içməli su ilə təmin olunub. Əhalinin qalan hissəsi isə tələbatını fərdi qaydada maşınlarla daşınan su ilə təmin edir və yaxud quyu sularından istifadə edir. “Azərsu” ASC-nin hazırladığı baş plana əsasən, gələcəkdə hər bir yaşayış massivi kimi Binə qəsəbəsində mərkəzləşdirilmiş sisteminin qurulması planlaşdırılır. Bu işlərin dövlət büdcəsində mərhələlərlə icrası nəzərdə tutulub”.
