Bakının Heydər Əliyev Sarayında “Bel Suono” piano triosunun konserti olacaq. Bu haqda bu gün, 11 iyul tarixində Bakuplus.az məlumat verir.
“The Best” adlı şou noyabrın 21-də saat 20:00-da başlayaraq saat 21:30-da başa çatacaq. Biletlərin qiyməti 30 manatdan başlayır və artıq şəhər kassalarında və onlayn şəkildə satılır.
“Bel Suono” klassik krossoverin proqressiv janrında çıxış edən dünyada yeganə piano triosu olan rus qrupudur. “Bel Suono”nun repertuarına unikal müəllif aranjimanı ilə klassik və müasir musiqinin ən yaxşı nümunələri, eləcə də qrupun solistləri tərəfindən xüsusi olaraq layihə üçün yazılmış yeni kompozisiyalar daxildir.
Kirill Quşçin, Anton Mosenkov və Nikita Xabin Moskva Konservatoriyasının məzunları, nüfuzlu beynəlxalq müsabiqələrin qalibləri, bəstəkar və improvizatorlardır.
“Bel Suono” 5 albom buraxıb. Qrup təkcə Rusiyada deyil, bütün dünyada tamaşaçıların sevgi və rəğbətini qazanıb. Onlar dəfələrlə Kreml, “Crocus City Hall”, Konservatoriyanın Böyük Zalı, Moskva Musiqi Evi, Tallinin “Aleksela” Konsert Zalı, Təl-Əvivin Çarlz Bronfman Auditoriyası, Tbilisi Konsert Zalı və bir çox digər nüfuzlu konsert salonlarında çıxış ediblər.
