Paytaxtın Nəsimi rayonunun Xaqani və Rixard Zorge küçələrinin kəsişməsində yerləşən işıqfor görünmür və sürücülərə problem yaşadır. Bu haqda bu gün, 21 avqust tarixində Bakuplus.az Xəzər Xəbər-ə istinadən məlumat verir.
Sürücü Elçin Şahverdiyev iddia edir ki, “gizlənən” işıqfora görə ona 60 manat və 3 cərimə balı tərtib edilib. Sürücü qırmızı işığı görmədiyini və ağac gövdələrinin işıqforun qarşısını kəsdiyi üçün yoluna davam etdiyini iddia edir. O, həmçinin əlavə edib ki, bu zaman kəsişən küçədən başqa bir avtomobil gəlsə idi, qəza qaçılmaz olardı.
Bakıda işıqforlara nəzarət edən Nəqliyyatı İntellektual İdarəetmə Mərkəzinin əməkdaşı Ömər Xıdırov bildirib ki, məsələdən xəbərdardırlar.
“Daxili İşlər Nazirliyinin Nəqliyyatı Intellektual İdarəetmə Mərkəzinin əməkdaşları tərəfindən paytaxt ərazisində mərkəzin balansında olan və ağac budaqları ilə görüntüsü məhdudlaşan svetoforlarla bağlı araşdırma aparılıb. Məhz bu problemlərin aradan qaldırılması istiqamətində aidiyyəti dövlət qurumlarına müraciət olunub, ancaq təəssüflər olsun ki, hələ də bu problem həll edilməyib. Qeyd olunan ərazidəki problemdən də məlumatlıyıq və bununla bağlı aidiyyəti üzrə müraciət olunub”, - Xıdırov açıqlamada deyib.
Cərimə olunan sürücü protokolla bağlı Baş Dövlət Yol Polisi İdarəsinə də müraciət edib. Qurum hadisənin araşdırıldığını bildirib.
