Nəsimi rayonu, Şamil Əzizbəyov küçəsində yeni yaşayış binasının inşası yekunlaşmaq bilmir. Bu haqda bu gün, 1 noyabr tarixində Bakuplus.az Xəzər Xəbər-ə istinadən məlumat verir.
Nazirlər Kabinetinin və Nəsimi rayon İcra Hakimiyyətinin sərəncamları ilə pilot layihə çərçivəsində 4 bina sökülərək ərazidə "Yeni Ailə" MTK-ya məxsus çoxmərtəbəli binanın inşasına başlanılmışdır.
Sakinlərin sözlərinə görə, bina 2020-ci ildə istismara verilməli idi, ancaq 3 ildir onlar yeni mənzillərinə köçə bilmirlər. Bundan əlavə, sakinlərin kirayə pullarının da verilməsi uzun müddətdir dayandırılıb.
“İllərdir kirayədəyik. Bizə deyirlər: “1 korpus hazırdır, gedin, köçün”. Ancaq həmin binada təhükəsizlik tədbirləri nəzərə alınmayıb və bir sıra kommunal problemləri var. Bizimlə 2 illik müqavilə imzalamışdırlar, amma 5 ildir evimizə köçə bilmirik”, - deyə sakinlər şikayət edirlər.
Nəsimi rayon İcra Hakimiyyətindən məsələ ilə bağlı bildirilib ki, müəyyən qədər gecikmələr olub. Buna baxmayaraq, tikinti işləri yekunlaşmaq üzrədir. Cari ilin sonuna qədər bütün texniki məsələlər həll olunacaq və sakinlər evlərinə köçürüləcəklər.
