Nəsimi rayonu, Həsən Əliyev, Mərdənov qardaşları, Sabit Rəhman və Novruzov qardaşları küçələrində əksər sakinlər tikinti şirkəti ilə müqavilə bağlayaraq kirayə evlərə köçüb. Sakinlərə hər ay kirayə haqqı ödənilir, amma ərazidə çoxmərtəbəli yeni binanın inşası gecikir. Sakinlər deyirlər ki, 1 ildən çoxdur kirayə evdə qalırlar. Hələ də binanın inşasına başlanmaması onları narahat edir. Bu haqda bu gün, 12 avqust tarixində Bakuplus.az ATV Xəbər-ə istinadən məlumat verir.
Həmin ərazidə tikinti işlərinin lənginməsinə səbəb Rəfail Məmmədov adlı bir şəxslə tikinti şirkətinin hələ də razılığa gələ bilməməsi göstərilir.
“Özəl torpağım olduğuna görə onu da verirəm şirkətə. Onun yerinə mənə qeyri-yaşayış 190 kv.m yer verirlər. Bizim evimizə görə isə təmiz içi 500 kvadratmetr, 630 kvadratmetr divar qarışıq, tam içi 540 kvadratmetr ev verirlər. Buna razılaşdıq. Amma sonra onlar sözlərindən qaçdılar”, – deyə Məmmədov şikayət edib.
Tikinti şirkətinin hüquqşünası bildirib ki, Rəfail Məmmədovla razılığa gələ bilməməyin səbəbi çox tələblər etməsidir.
“Müqavilə bağlamış sakinlər haqlı olaraq narazılıqlarını bildirirlər ki, tikinti işləri davam etdirilmir və onlar kirayədə qalıblar. Vətəndaş tikinti şirkətindən sahib olduğu faktiki sahədən dəfələrlə artıq, yəni 640 kvadratmetrlik mənzil, 200 kvadratmetrlik obyekt, 400 min manat pul və 3 qaraj sahəsi tələb edir, bu da ağlasığmaz məbləğdir. Mənzilin faktiki sahəsi vətəndaşın qeyd etdiyindən dəfələrlə aşağıdır, rəsmi sənədlərdə də bu öz əksini tapır”, – deyə hüquqşünas əlavə edib.
Məsələ ilə bağlı Nəsimi RİH-nin nümayəndəsi Ələsgər Rüstəmov deyir ki, vətəndaşla dəfələrlə söhbət aparılıb, lakin razılıq əldə edilməyib. Amma yenidən həm şirkətlə, həm vətəndaşla danışıqlar aparılacaq ki, müqavilə bağlayan sakinlər bu mübahisədən daha çox əziyyət çəkməsin.
