Bakının Xətai rayonu, Seyid Əzim Şirvani küçəsi, 1A ünvanında yaşayış binasının həyətində ikimərtəbəli bina tikilir. Bu haqda bu gün, 15 mart tarixində Bakuplus.az Xəzər Xəbər-ə istinadən məlumat verir.
Sakinlər iddia edirlər ki, bu inşa işləri qeyri-qanuni aparılır. Onların sözlərinə görə, tikinti aparan şəxs əvvəllər həyətin bir hissəsində torpaq icarəçisi olub. Sonradan tikinti işləri başlayanda uşaq meydançası da zəbt olunaraq tikinti sahəsində istifadə olunub.
Vətəndaşların təqdim etdikləri sənəddə Dövlət Şəhərsalma və Arxitektura Komitəsindən 2020-ci il dekabrın 17-də ərazidə qanunsuz tikinti aparıldığı və buna görə də tikinti işlərinin dayandırıldığı barədə məlumat əksini tapıb.
Sakinlərin sözlərinə görə, inşaatçı onlara tikintiyə icazəni Xətai rayon İcra Hakimiyyəti tərəfindən verildiyini iddia edir. Lakin Bakı Şəhər İnzibati Məhkəməsi İcra Hakimiyyətinin sözügedən qərarının etibarsız sayılması barədə qərar çıxarıb.
Ərazidə tikinti işlərini apardığı bildirilən Elxan adlı şəxs tikintiyə dair hər bir sənədin mövcud olduğunu bildirib.
Sakinlər vəkilin köməkliyi ilə aidiyyəti quruma müraciət ediblər.
Fövqəladə Hallar Nazirliyindən verilən məlumata görə, nazirliyin mütəxəssis qrupu əraziyə baxış keçirəcək və tikili ilə bağlı qanunvericiliyə uyğun qərar qəbul edəcək.
