3 saylı Şəhər Klinik Xəstəxanasında xəstə yaxınına kobud davranılıb.
Bu barədə Bakuplus.az-a şikayətçi Pərvanə Nəsirova məlumat verib. Onun sözlərinə görə, dayısı Hüseynağa Məmmədov uzun müddətdir ki, dializ xəstəsidir. Vəziyyəti pis olduğu üçün dünən axşam saatlarında 3 saylı Şəhər Klinik Xəstəxanasında (Sabunçu) Maqnit Rezonans Tomoqrafiyası (MRT) olunub. Gecə xəstənin halı yenidən dəyişib. O, dərhal həmin xəstəxanaya çatdırılıb və Reanimasiya şöbəsinə yerləşdirilib. Şikayətçi reanimasiya həkimindən heç bir narazılıqlarının olmadığın deyib. Xəstənin yaxınları MRT-nin cavabı ilə bağlı həkim-radioloq Mürsəl Əliyevə müraciət ediblər. O isə bu barədə bir həftədən sonra məlumat veriləcəyini deyərək və heç bir məlumat vermədən kobud rəftar edib.
“Ötən gün axşam saat 18:00 radələrində MRT-dən keçdik. Deyiblər ki, get, gələn həftənin bazar ertəsi cavab çıxacaq. Gecə dayımın vəziyyəti pisləşdi. Onu 01:30 radələrində xəstəxanada reanimasiyaya yerləşdirdik. Səhər gəlib MRT cavabları soruşduqda, xəstəxana mühafizəçisi və həkim Mürsəl Əliyev bizə kobud davrandı. Danışdığım halda həkim qapını üzümə çırpdı.
MRT-nin cavabını demədikləri üçün dayımın diaqnozu bilinmir. İnsult keçirib- keçirmədiyi bəlli deyil. Dayım 7 ildir ki, dializ xəstəsidir. Hazırda reanimasiyada yatır. Paralel olaraq dializ də köçürülür. Məsələyə ciddi yanaşılmasını istərdim. Lazımi qurumlara şikayət etmişəm”, - P.Nəsirova bildirib.
Sonda şikayətçi iki ay öncə qaraciyər sirrozundan əziyyət çəkən dayısı Əbdülağa Məmmədovun da bu xəstəxanada eyni problem ilə qarşılaşdığını qeyd edib.
Bildirək ki, məsələ ilə bağlı Tibbi Ərazi Bölmələrini İdarəetmə Birliyinə (TƏBİB) sorğu ünvanlanıb.
Nəzrin Vahid
