Paytaxtın Xəzər, Qaradağ və Yasamal rayonlarının qaz təchizatında fasilə yaranıb. Bu haqda bu gün, 14 avqust tarixində Bakuplus.az Azəriqaz-a istinadən xəbər verir.
“Zabrat-Buzovna-Türkan” magistral qaz kəmərinin 21,5-ci km-də və Yasamal rayonunun Rahim Məmmədov küçəsində qaz xəttində sızmanı aradan qaldırmaq məqsədilə qazın verilişi dayandırılıb. “Lökbatan” QPS-də sənaye qaz xətlərində yeni quraşdırılmış kollektor üzərinə köçürülməsi, əhali qaz xətti üzərində klapanın quraşdırılması və modul ölçü qovşaqlarında təmir işləri ilə əlaqədar qaz təchizatı dayandırılıb.
Təmir işləri aparılan zaman Xəzər rayonunun (Stansiya Qala və Mərdəkan yeni yaşayış massivləri), Yasamal rayonunun (R. Məmmədov, K.Kazımzadə, Ş.Mehdiyev, Ə. Ələkbərov küçələri, H.Cavid prospekti), Qaradağ rayonunun (Lökbatan qəsəbəsi, “Qobu Park” yaşayış kompleksi) bir hissəsinin qaz təchizatında müvəqqəti fasilə yaranıb.
