Bakı sakini yaşadığı mənzildə qeydiyyatdan keçə bilmir. Bu haqda bu gün, 29 mart tarixində Bakuplus.az Xəzər Xəbər-ə istinadən məlumat verir.
Paytaxtın Sabunçu rayonu, Yeni Ramana qəsəbəsində yaşayan 20 Yanvar şəhidinin qızı, ikinci qrup əlil, Qarabağ qazisinin həyat yoldaşı Sevinc Rüstəmova 3 aydır ki, yaşadığı mənzildə qeydiyyatdan keçə bilmir və şəxsiyyət vəsiqəsi heç yerdə qəbul olunmur.
“Anam şəhid xanımı olduğuna görə ona ev verdilər. Biz də evsiz olduğumuz üçün birbaşa bu evə köçdük. Öncəki yerimizdən qeydiyyatdan çıxdıq, ancaq bu evə qeydiyyata düşə bilmədik. Anam da vəfat edən zaman şəxsiyyət vəsiqəsi aktiv deyildi”, - deyə S.Rüstəmova qeyd edib.
Ailə aztəminatlı olduğuna görə onlara sosial yardım verilməlidir, ancaq şəxsiyyət vəsiqələri aktiv olmadığından onlar burada da problem yaşayırlar.
ƏƏSMN-dən məsələ ilə bağlı bildiriblər ki, adıçəkilən binalarda sənədləşmə işləri artıq yekunlaşıb. Yaxın zamanda ailələr qeydiyyatdan keçəcək.
