Nəsimi rayonu, Bülbül prospekti, 63 ünvanındakı 39 nömrəli beşmərtəbəli binanın damında özbaşına tikinti işləri aparılır. Bununla yanaşı, binanın yalnız bir blokuna hansısa sakin tərəfindən şəxsi lift də çəkilib. Bu haqda bu gün, 19 oktyabr tarixində Bakuplus.az Bizim.Media-ya istinadən məlumat verir.
Beşinci mərtəbədən dama pilləkən, pəncərə və qapı açılıb, damın üzərində əlavə mərtəbə tikilir.
Vahid adlı bina sakininin sözlərinə görə, lifti bir vaxtlar bu binada və həmin blokda yaşayan Azərbaycan Elmlər Akademiyasının müxbir üzvü Əlövsət Quliyev çəkdirib: “Liftdən blokun bütün sakinləri istifadə edirlər. O vaxt dəmirdən quraşdırılmışdı. Sadəcə olaraq bir neçə gün bundan əvvəl üstü taxta ilə örtüldü və rəngləndi ki, görünüşü normal olsun. Bu lift qanuni fəaliyyət göstərir. Sakinlər lift və işıq pulu verirlər. Liftin kabinəsi 10 il əvvəl yenilənib”.
Dövlət Şəhərsalma və Arxitektura Komitəsindən bildirilib ki, məsələdən xəbərdardırlar. Hadisə yerinə gələn əməkdaşlar faktı aşkarlayaraq işləri dayandırıblar. Tikinti işləri ilə bağlı, həmçinin Fövqəladə Hallar Nazirliyi və Nəsimi Rayon İcra Hakimiyyətinə müraciət edilib.
