Xəzər rayonu, Binə qəsəbəsi, 4-cü dalanda yol iki hissəyə ayrılıb. Onlardan biri asfaltlanıb, digəri isə qışda palçıq, yayda isə toz-torpaqdır. Bu haqda bu gün, 9 fevral tarixində Bakuplus.az İTV-yə istinadən məlumat verir.
Sakinlər illərdir ki, bu ünvanda yaşadıqlarını deyirlər. İndiyədək yolda bir dəfə də olsun təmir işləri aparılmayıb. Qonşular problemi öz hesablarına həll etməyə çalışsalar da, heç bir nəticə əldə edə bilməyiblər. Bir müddət sonra yol yenidən bərbad vəziyyətə düşüb.
Qış aylarında isə yol daha da keçilməz olur. Yağış yağan kimi palçıqdan hərəkət etmək mümkün olmur.
Qəsəbə bələdiyyəsinin rəsmiləri məsələdən xəbərdar olduqlarını bildirdilər.
Binə bələdiyyəsinin sədri Habil Həmidov: “Qeyd olunan ərazi ilə bağlı Xəzər RİH tərəfindən tədbirlər planı hazırlanaraq “Azəravtoyol”a təklif göndərilmişdi. Qurumdan da məlumat verilmişdi ki, vəsait ayrılan kimi həmin hissələrdə də asfalt örtüyü çəkiləcək”.
“Azəravtoyol”dan isə bildirildi ki, qeyd olunan yolda təmir işlərinin aparılması artıq təkliflər planına daxil edilib.
[caption id="attachment_90081" align="alignnone" width="640"]
Foto İTV[/caption]
