Xəzər rayonu, Buzovna qəsəbəsinin sakinləri yük maşınlarından şikayət edirlər. Bu haqda bu gün, 15 aprel tarixində Bakuplus.az ATV-yə istinadən xəbər verir.
Söhbət Nadir Axundov küçəsindən gedir. Sakinlər bildirirlər ki, iritonnajlı maşınlar daimi olaraq onların yaşadıqları küçədə park edilirlər. Bu da sakinlərin narazılığına səbəb olur. Yük maşınları yolları dağıdıb, ətrafı toz və palçıq edir. Daimi səs-küy insanları rahat yaşamağa qoymur.
“Traktorlar, yük maşınları, hərəsi bir iş görür. Evimə gedirəm, biri yağ dəyişir, digəri kranını qaldırır. Sürücülərdən nə söyüş desən, eşitmək olur”, – deyə sakinlər bildirirlər.
Xəzər RİH başçısının Buzovna qəsəbə inzibati ərazi dairəsi üzrə nümayəndəliyindən bildirildi ki, yaxın vaxtlarda yük maşınlarının küçədən yığışdırılması üçün aidiyyəti qurumların əməkdaşları ilə birgə tədbir görüləcək. Yolların təmiri ilə bağlı isə artıq müraciət olunduğu qeyd edilib.
