Yenilənib
Buzovna qəsəbəsində sakinlərin özbaşına olaraq quraşdırdıqları şlaqbaum sökülüb. Daxili İşlər Nazirliyinin (DİN) mətbuat xidmətindən verilən məlumata görə, ərazidə heç bir məhdudiyyət yaradan maneə yoxdur.
12:00 - Buzovnada quraşdırılan şlaqbaumla bağlı açıqlama: “Biz villa sahibi deyilik”
Bakının Xəzər rayonu, Buzovna qəsəbəsində ümumi istifadədə olan avtomobil yoluna şlaqbaum qoyulması təşəbbüsü küçənin bu hissəsində yaşayan 20 ailədəndir. Bu haqda bu gün, 25 aprel tarixində Bakuplus.az Caliber.az-a istinadən məlumat verir.
“Biz villaların sahibi deyilik, qəsəbənin sakinləriyik. Şlaqbaumdan sonra dalandır, orada heç bir keçid yoxdur. Şlaqbaumun quraşdırılmasına səbəb son vaxtlar burada neqativ faktların baş verməsi - avtomobillərlə tanış olmayan insanlar gəlməsi, şüşələri açıq yüksək səslə musiqi dinləməyə başlamasıdır. Üstəlik tanımadığımız insanlar gəlib qapılarımızın ağzında maşın saxladığı üçün öz evlərimizə girib-çıxmaqda çətinlik çəkirdik. Məsələ ilə bağlı dəfələrlə ərazi üzrə polis bölməsinə ərizə ilə müraciət etmişik.
Sonda hamımız (20 ailə) şlaqbaum quraşdırmaq üçün ümumi razılaşdırılmış qərara gəldik. Təkrar qeyd edirik, həmin şlaqbaum heç kimin çimərliyə getməsinə və ya ümumi avtomobil yoluna çıxışına, eləcə də ərazidə nəqliyyat vasitələrinin hərəkətinə qətiyyən maneə törətmir. Biz heç bir yolu kəsməmişik. Xahiş edirik, yayılan məlumatlara aydınlıq gətirmək üçün sizə göndərdiyimiz cavabı dərc edəsiniz”, - deyə sakinlər qeyd ediblər.
