Bakıda ata qızına qarşı seksual hərəkətlər edib.
Gencexeber.az xəbər verir ki, hadisənin istintaqı Bakı Ağır Cinayətlər Məhkəməsinin hakimi Rasim Sadıxovun sədrliyi ilə keçirilib.
Belə ki, Qabil Əliyev (ad şərtidir) 1981-ci ildə Gəncə şəhərində dünyaya gəlib. Göygöl rayonu, Üçtəpə kəndində qeydiyyatda olub. Lakin işlə əlaqədar ailəsi ilə birlikdə Bakı şəhərində kirayə mənzildə yaşayıblar. 2021-ci ilin yanvar ayından 2024-cü ilin mart ayına qədər 17 yaşlı qızı Lamiyə Əliyevaya (ad şərtidir) qarşı seksual hərəkətlər edib. Bu hadisələr Lamiyənin 13 yaşı olduğu zaman başlayıb. Arvadı Gülçin Əliyevanın (ad şərtidir) evdə olmadığı vaxtlardan istifadə edərək, Qabil cinsi ehtirasını ödəmək üçün qızından istifadə edib.
Qabil Əliyev Azərbaycan Respublikası CM-nin 150.3.3-cü (14 yaşına çatmayan şəxsə qarşı seksual hərəkət) maddəsi ilə təqsirləndirilib.
Məhkəmədə təqsirləndirilən şəxs qismində dindirilən Qabil Əliyev özünü təqsirli bilməyib. İfadəsində göstərib:
“Qızım mənə böhtan atır. Böhtan atmağa da onu əmisi, yəni qardaşım vadar edib. Həm də qızım cavan oğlanlarla əlaqə saxladığı və ərə getmək istədiyi üçün onu 2 dəfə döymüşəm. Buna görə məndən heyf çıxır”.
Məhkəmə iclasında zərərçəkmiş Lamiyə Əliyeva ifadə verib:
“Atamın bu addımı ilk dəfə 2021-ci ildə olub. O zaman mənim 13 yaşım vardı. Anam səhər 5-6 arası durub işə getdi. Atam otağıma gələrək əlini bədənimə toxundurub sığallamağa başladı. Ona olmaz belə şey dedim. Bu sözdən sonra mənə əsəbiləşib otaqdan çıxıb getdi. 14 yaşım olandan sonra yenə eyni qaydada atam gəlib mənə seksual hərəkətlər etmək istədi. Amma icazə vermədiyim üçün məqsədinə nail ola bilmirdi.
2022-ci ilin avqust ayında atam otağıma gələrək mənə mobil telefon hədiyyə edəcəyini, əvəzində isə onun istəyini yerinə yetirməyimi dedi. Yenə razı olmadım. 2024-cü ildə yenə otağıma gəlib bu dəfə döyərək istəyini yerinə yetirməyə başladı. Həmin il balaca qardaşım öldüyü üçün atam bir gün otağıma gəldi. Dedi ki, baxıcıya gedib və ona bəd-nəzərin götürülməsi üçün mənim bədənimdən öpülməsi bildirilib. Buna razı olmasam da, atam məni döyərək məcbur etdi. Bədənimdən öpməyə, sığallamağa başladı.
Bir gün telefonda mənim başıma gələn hadisənin başqa qızın da yaşadığını gördüm. Həmin qız atasını ifşa etmək üçün səs yazısını qeydə alıb. Mən də eyni onun kimi etdim. Atamın mənimlə birlikdə olmaq istədiyini dediyi zaman səsini yazdım. Daha sonra polisə şikayət etdim. O, düzgün ifadə vermir. Əmim atama qarşı ifadə verməyim üçün heç bir təzyiq etməyib”.
Məhkəmə iclasında şahid qismində dindirilən Lamiyə Əliyevanın anası Gülçin Əliyeva deyir ki, ərinin qızına qarşı etdiyi hərəkətlərdən məlumatı olmayıb:
“JEK-də xadimə işlədiyim üçün səhər saat 5-dən ərazini yığışdırmağa gedirəm. Ərim və uşaqlarım isə evdə qalırdı. 2024-cü ilin mart ayında axşam vaxtı polis əməkdaşları məni və ərimi bölməyə dəvət etdikdən sonra hadisədən xəbərim olub. Qızıma inanıram, ərimə isə layiqli cəza verilməsini tələb edirəm”.
Məhkəmədə səs yazılar olan disk tədqiq edilib. Səs yazılarında olan məlumatla Qabil Əliyevin törətdiyi cinayət təsdiqini tapıb. Tərəflərin çıxışından sonra məhkəmə müşavirəyə yollanıb. Sonda məhkəmənin qərarı ilə Qabil Əliyev 17 il müddətində azadlıqdan məhrum edilib.
