Xətai rayonu, Gəncə prospektində yerləşən 9 mərtəbəli yaşayış binalarının həyətində olan park məhv olunur. Ərazidə bəzi ağaclar yandırılıb, bəziləri su olmadığından quruyub. Bu haqda bu gün, 1 fevral tarixində Bakuplus.az ATV-yə istinadən məlumat verir.
Sakinlər iddia edirlər ki, ağaclar məqsədli şəkildə gecə saatlarında yandırılıb, çünki ərazidə yeni binanın tikintisi nəzərdə tutulur. Ərazidən yaxın yerdən keçən qaz borularında xoşbəxtlikdən yanğın zamanı hər hansı partlayış baş verməyib.
Yaşıllıq bir hektardan çox ərazini əhatə edir. Sakinlər deyirlər ki, vaxtilə burada ağacları suvarmaq üçün öz vəsaitləri hesabına su boruları da çəkiblər. Ancaq ötən il borular ərazidə abadlıq işləri aparılması adı ilə kəsilib. Bundan sonra ağaclar qurumağa başlayıb.
Xətai Rayon İcra Hakimiyyətindən isə bildirildi ki, ərazidə bina tikintisi ilə bağlı iddialar əsassızdır. Su xətti çəkildikdən sonra isə həmim ərazidə abadlıq işləri aparılacaq.
Ərazidəki ağacların yandırılması ilə bağlı isə artıq Ekologiya və Təbii Sərvətlər Nazirliyi tərəfindən akt tərtib olunub. Toplanan materiallar təqsirkar şəxslərin məsuliyyata cəlb edilməsi üçün FHN-in əməliyyat və istintaq idarəsinə verilib.
[caption id="attachment_89151" align="alignnone" width="640"]
Foto ATV rəsmi Youtube kanalı[/caption]
