"Azərbaycan Dəmir Yolları" QSC tərəfindən istifadəyə verilən Bakı-Balakən qatarının bilet qiymətləri haqqında şikayətlər artıb. Qatarla səyahət üçün biletin baha olması vətəndaşlarda ciddi narazılıq yaradıb. Məsələ ilə bağlı hüquq müdafiəçisi Rauf Zeyni Demokrat.az-a açıqlamasında bildirib ki, son illərdə bir çox istiqamətlərdə Müzəffər Ali Baş Komandanın apardığı islahatlar öz bəhrəsini verməkdədir:
"İslahatlar yol infrastrukturuna və nəqliyyat sahəsinə də öz təsirini göstərir. Azərbaycan Dəmir Yollarında da bu islahatların şahidi oluruq. Ancaq vəziyyətin indikindən daha yaxşı olmasını gözləyirik. Mənzil başına sürətli çatmaq üçün sürətli qatar xidmətləri, vətəndaşların gecə saatlarında da mənzil başına çatması üçün də işlər görülməlidir".
Onun sözlərinə görə, islahatlar hər zaman lazımi effekti vermir:
"Bakı-Balakən qatarı ilə səyahətdə 2 nəfərin təkcə çarpayı üçün 80 manat verməsi biabırçılıqdır. Bu və digər məsələlər ADY rəhbərliyi tərəfindən müzakirə olunmalıdır. Vətəndaşların məmnunluğu, rifahı üçün optimal rəqəmlər müəyyən edilməlidir. Rəqəmləri müəyyən edilərkən vətəndaşların sosial vəziyyəti nəzərə alınmalıdır. Müvafiq orqanlar məsələyə baxmalıdır. Təkcə bu məsələdə yox, bütün sahələrdə vətəndaşın məmnunluğu düşünülərək qərar qəbul olunmalıdır".
